{"kind":"section","lang":"la","language":"Latin","title":"Aratea 916-961","citation":"Avienus, Aratea 916-961","ref":"916","level":null,"urn":null,"url":"https://interlinea.aeterna-institute.org/library/latin/avienus/aratea/916","api":"https://interlinea.aeterna-institute.org/api/v1/library/latin/avienus/aratea/916","markdown":"https://interlinea.aeterna-institute.org/library/latin/avienus/aratea/916.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":296,"text":"illae in subrecti cogunt iter aetheris orbem\nnitentes in summa poli, motuque feruntur\naduerso Solis radiis. Ceu, cum uada cumbam\nprona uehunt, siquis prora nitatur ab alta\nin puppim proferre pedem, uia carpitur olli\ncursibus inceptis contraria, uis ita in istis\nobuia labenti semper sustollitur aethrae.\nVnica quin solis adolent incendia flammis;\nlonga uolutandis tamen ollis tempora currunt\npigraque se referunt sedes sortita priores\nomnia. Non illas animis audacibus ergo,\ncarmine non caeco temptabimus: hoc satis unum\nMusa mihi, satis hoc longi labor egerit aeui\nsi defixarum cursus et signa retexam.\nQuattuor aerios zonae cinxere meatus,\nquattuor has cursus et tempora nosse uolentem\nscire sat est. Quin signa etiam sunt quattuor istis\nplurima quae zonis haerentia conuoluuntur.\nIpsae inconcussa retinentur sede per annos,\nmutuaque implexae sibimet consortia mordent;\nat modus in binis protenditur. Aurea pepli\nsidera nocturni si suspectare libebit\nnec scindunt medium Phoebeia lumina mensem\nlangueat ut stellis species hebes, omnia caeli\nillustrante dea ac flammas superante minores,\norbe sed haud pleno sinit igni feruere acuto\nsidera, candentis speciem super inspice Lactis\nprotendi caelo. Color olli nomen ab ortu\nprimigeno statuit; sic zonam Graecia sollers\nconcelebrat, nostro sic balteus ore notatur.\nNon isti forma similis similisue colore\ncirculus est alius; modus et mensura duobus\nest compar solis, alios duo parcior artat\nlinea nec multa trahit istos ambitus aethra.\nHorum alius, duri qua soluunt flabra Aquilones\net qua praecipitant Borealia flamina sese,\naxe Lycaonio iacet obuius. Hic Geminorum\nsunt capita, hic genua Aurigae defixa quiescunt.\nCirculus hic idem retinet pede Persea laeuo\nAtque sinistro umero; cubito tenus hic quoque dextram\nsustinet Andromedae (manus extima desuper acri\nsubrigitur Boreae, cubito inclinatur in Austrum\nmaerens Andromeda). Hic celeris uestigia summa\npraestringuntur Equi, praestringitur Ales ab ipso\nuerticis extremo. Secat hic umeros Ophiuchi\ncirculus et secum flagrantia dorsa reuoluit.","prev":{"citation":"Aratea 872-915","label":"Lines 872-915","url":"https://interlinea.aeterna-institute.org/library/latin/avienus/aratea/872","api":"https://interlinea.aeterna-institute.org/api/v1/library/latin/avienus/aratea/872"},"next":{"citation":"Aratea 962-1004","label":"Lines 962-1004","url":"https://interlinea.aeterna-institute.org/library/latin/avienus/aratea/962","api":"https://interlinea.aeterna-institute.org/api/v1/library/latin/avienus/aratea/962"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}