{"kind":"section","lang":"la","language":"Latin","title":"Aratea 962-1004","citation":"Avienus, Aratea 962-1004","ref":"962","level":null,"urn":null,"url":"https://interlinea.aeterna-institute.org/library/latin/avienus/aratea/962","api":"https://interlinea.aeterna-institute.org/api/v1/library/latin/avienus/aratea/962","markdown":"https://interlinea.aeterna-institute.org/library/latin/avienus/aratea/962.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":283,"text":"Erigone tepidum sese submittit in Austrum,\nuirgineosque pudens zonae super inuidet artus.\nSed Leo, sed Cancer Borealis tramite caeli\nuiscera protendunt; at circulus ima calentis\npectora perque aluum procul in postrema Leonis\nsuccedit; secat ast alium per uiscera plana\net medium subter caua tegmina diuidit, orbe\nlumina secludens altrinsecus. Orbita porro\nista poli partis si discernatur in octo,\nquinque super uoluit se partibus, at tribus alti\nintrat stagna sali. Sol istinc flammifer aethram\niam relegit, pulsuque deus semel ordine facto\nflectitur aestiuo, neque celsum semita in axem\nsideris erigitur: uia rursum nota iugales\nsuscipit, inque Notum rutili redit orbita Solis.\nCirculus iste quidem Cancro tenus adiacet axem\nsemper inocciduum. Procul alter cardine in Austri\ndiuidit imbriferi corpus medium Capricorni,\nIdaeique pedes pueri postremaque caudae\ncaeruleae. <Lucet> breuis hic Lepus, hic Canis artus\nconditur extremos, hic Thessala cernitur Argo,\nhic Centaureae fera molis terga secantur.\nIste uenenatae disiecta uolumina caudae\namputat, hic arcu protenditur ampla sagitta.\nVltimus hic Phoebo locus est, ubi lapsus in Austrum\npellitur: albenti cum canent tempora bruma.\nsideris hic metae; procul istuc caelite curru\naxe sereniferi descendit Sol Aquilonis.\nPartibus iste tribus tantum se circulus effert,\nquinque latet, crepuli succedens stagna profundi.\nInter utrumque dehinc, quantus iacet ambitus illi\nzonarum cani specie quae lactis in aethra\ncernitur, ingenti se tramite linea tendens\ndiuidit ima Noti discernit et alta Aquilonis.\nHic luci modus et tenebris sub lege magistra\npensatur: nox aequa diem subit, aemula Phoebus\nlumina substituit paribusque reuoluitur horis,\nuel cum summa aestas coquit agri uiscera hiantis,\nuel cum floricomo iam tellus uere mouetur.\nAst isti, celsae quae tramite panditur aethrae,\nindicium est Aries: hunc totum linea quippe\nsustinet. Hic Tauri curuantur crura minacis\net rutilat stellis hic balteus Orionis.","prev":{"citation":"Aratea 916-961","label":"Lines 916-961","url":"https://interlinea.aeterna-institute.org/library/latin/avienus/aratea/916","api":"https://interlinea.aeterna-institute.org/api/v1/library/latin/avienus/aratea/916"},"next":{"citation":"Aratea 1005-1050","label":"Lines 1005-1050","url":"https://interlinea.aeterna-institute.org/library/latin/avienus/aratea/1005","api":"https://interlinea.aeterna-institute.org/api/v1/library/latin/avienus/aratea/1005"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}