{"kind":"section","lang":"la","language":"Latin","title":"Opuscula nova 1.9.2","citation":"Bebel, Opuscula nova 1.9.2","ref":"1.9.2","level":null,"urn":null,"url":"https://interlinea.aeterna-institute.org/library/latin/bebel/opuscula-nova/1.9.2","api":"https://interlinea.aeterna-institute.org/api/v1/library/latin/bebel/opuscula-nova/1.9.2","markdown":"https://interlinea.aeterna-institute.org/library/latin/bebel/opuscula-nova/1.9.2.md","author":{"name":"Bebel","url":"https://interlinea.aeterna-institute.org/library/latin/bebel"},"work":{"title":"Opuscula nova","url":"https://interlinea.aeterna-institute.org/library/latin/bebel/opuscula-nova","urn":null},"verse":true,"words":155,"text":"Sat fuerat nimium o doctor celeberrime, Vatem.\nLargiter et dapibus, et saturasse mero.\nAc vidisse satis tam multa poemata Vatum,\nTot sophiae tecum, conspicuosque libros.\nInsuper ostendis de quo proverbia tractant.\nSartorem claudum, quemque videre iuvat.\nNon ego sum dixi, si me contempseris usquam\nNon claudus sartor, decipere atque velis,\nSi faciam, iuro, sim cunctis iure vocandus,\nO sartor claudus, si voluisse nego\nDenique cum risu passim, pueri, atque puellae\nSartorem claudum, nominitantque senes.\nIn linguas hominum tamen hoc cur venerit inde\nAccipio, si non auguror ipse male\nIngenio tardo est, pedibus potius vel iniquis,\nEt gressum nescit legitimum in senio.\nHincque movetur et hinc, hominum nec more sueto,\nGressibus obliquis itque reditque vias.\nDoctior est multo servus doctoris Othonis.\nQui iuvenis nondum lustra quaterna videt,\nImmoto pede stans, prae cunctis visus acutus.\nAtque cubile videt solis utrumque simul.\nAt neuter reor est nostris nutritus in oris.\nNon vadit nostro hic more, nec ille videt.","prev":{"citation":"Opuscula nova 1.9.1","label":"De sacerdote loripede.","url":"https://interlinea.aeterna-institute.org/library/latin/bebel/opuscula-nova/1.9.1","api":"https://interlinea.aeterna-institute.org/api/v1/library/latin/bebel/opuscula-nova/1.9.1"},"next":{"citation":"Opuscula nova 1.10","label":"De superbo adolescente.","url":"https://interlinea.aeterna-institute.org/library/latin/bebel/opuscula-nova/1.10","api":"https://interlinea.aeterna-institute.org/api/v1/library/latin/bebel/opuscula-nova/1.10"},"credit":{"text":"Bebel, Opuscula nova. Text: CAMENA (Universität Mannheim), CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/nevenjovanovic/camena-neolatinlit/blob/771bb7f96826dfacdd920e48b8dfb2c33c52efe7/poemata/bebelopuscula_1.xml","quality":"ocr"}}