{"kind":"section","lang":"la","language":"Latin","title":"Opuscula nova 2.1-12","citation":"Bebel, Opuscula nova 2.1-12","ref":"2.1","level":null,"urn":null,"url":"https://interlinea.aeterna-institute.org/library/latin/bebel/opuscula-nova/2.1","api":"https://interlinea.aeterna-institute.org/api/v1/library/latin/bebel/opuscula-nova/2.1","markdown":"https://interlinea.aeterna-institute.org/library/latin/bebel/opuscula-nova/2.1.md","author":{"name":"Bebel","url":"https://interlinea.aeterna-institute.org/library/latin/bebel"},"work":{"title":"Opuscula nova","url":"https://interlinea.aeterna-institute.org/library/latin/bebel/opuscula-nova","urn":null},"verse":false,"words":299,"text":"In hoc atque futuris annis crescet vinum et triticum, legentque homines multa genera frumentorum, timendum tamen est secundum sententiam Hali Habenragel, ne parum congregent qui praediis carent, aut seminare obmiserunt, nisi aliorum possessiones invadere velint. Per oppositionem Saturni cum Marte indicatur preciosius futurum triticum quam milium, et milium acceptius quam lolium. Eadem et evidentiori ratione suspicandum est minus et tenuius frumentum collectum iri in montibus quam planitie, ea etiam de causa quia minus seminis committetur montosis praediis propter siccitatem et lapides. Frequentiori in usu erit panis triticeus quam milii. Alcindus item tradit, plus vini extorqueri de uvis quam piris et aliis fructibus, et si uva non bene maturuerit, erit vinum acerbum. Vinum Cretense, quod Malmaticum vocant, carius erit quam vinum vernaculum. erit etiam melioris saporis. hoc quilibet bibens testabitur, nisi laesum omnino fuerit palatum. Plus item iuvabit naturam hominis quam nostrum. Nam mane sumptum stomachum confortabit, meridie refrigerat corpus, vesperi sitim extinguit. Caveant sibi quorum arbores arefactae sunt in praediis eorum, quia fructus non producent propter lunae oppositionem. Plus vescentur homines piscibus et leguminibus in mense Februario et Martio, propter observationem quadragesimae quam aliis temporibus anni. In rariori tamen usu erit piscis apud pauperes propter respectum Aquarii contrarium pecuniae, ut notat Albumasar in quarto tripartiti. Propter altercationem quorundam signorum caelestium sciendum res quasdam nocivas futuras usui humano. Ad cavendum hunc influxum abstinebis ne lapides et paleas devores. Tempore belli caveant belligerantes utriusque partis ne vulnerentur. timendum enim ne aliqui moriantur quia si moriantur, non facient amplius bellum, ut conveniunt omnes astrologi. Civitates Italiae Roma, Florentia. Senae. ceteraeque omnes erunt in iisdem locis ubi exactis temporibus fuerunt et hoc secundum sententiam Ptolemaei. Multi vagabuntur per diversas regiones et loca longinqua. aliqui tamen in propinquo manebunt non ulterius progredientes propter penuriam viatici. aliqui vero procedent non timendo latrones propter divitias conquirendas.","prev":{"citation":"Opuscula nova 2.0","label":"Prognosticon ex Etrusco sermone in latinum traductum ab Anno domini. M. D. IX","url":"https://interlinea.aeterna-institute.org/library/latin/bebel/opuscula-nova/2.0","api":"https://interlinea.aeterna-institute.org/api/v1/library/latin/bebel/opuscula-nova/2.0"},"next":{"citation":"Opuscula nova 2.13-26","label":"2.13 to 2.26","url":"https://interlinea.aeterna-institute.org/library/latin/bebel/opuscula-nova/2.13","api":"https://interlinea.aeterna-institute.org/api/v1/library/latin/bebel/opuscula-nova/2.13"},"credit":{"text":"Bebel, Opuscula nova. Text: CAMENA (Universität Mannheim), CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/nevenjovanovic/camena-neolatinlit/blob/771bb7f96826dfacdd920e48b8dfb2c33c52efe7/poemata/bebelopuscula_1.xml","quality":"ocr"}}