{"kind":"section","lang":"la","language":"Latin","title":"Opuscula nova 4.17","citation":"Bebel, Opuscula nova 4.17","ref":"4.17","level":null,"urn":null,"url":"https://interlinea.aeterna-institute.org/library/latin/bebel/opuscula-nova/4.17","api":"https://interlinea.aeterna-institute.org/api/v1/library/latin/bebel/opuscula-nova/4.17","markdown":"https://interlinea.aeterna-institute.org/library/latin/bebel/opuscula-nova/4.17.md","author":{"name":"Bebel","url":"https://interlinea.aeterna-institute.org/library/latin/bebel"},"work":{"title":"Opuscula nova","url":"https://interlinea.aeterna-institute.org/library/latin/bebel/opuscula-nova","urn":null},"verse":true,"words":275,"text":"Eximios inter cunctis memorande diebus\nO Nauclere viros et probitatis honos.\nQuod modo suscepta est per te provincia, rerum\nScribere sacrarum de ambitione librum.\nEt solet a nostris nunc illa simonia dici\nNamque Simon sceleris hic magus auctor erat,\nRem facis imprimis dignam, nec laude carentem\nAtque sacerdoti iure cavenda mones.\nNam cum dira lues vitiorum regnet in orbe\nInfandumque scelus agmine cuncta trahat.\nNulla tamen maior pestis, vesania nulla\nIllius exuperat impietatis opus.\nQuod si non fallar, si sim non sordidus auctor\nDivitiae pingues hoc peperere malum.\nOmne malum nobis funesta pecunia primum\nIntulit, et sortis luxuriantis opes.\nPraestabat quondam castos ecclesia mores\nCum Petrus in summa sede regebat inops.\nCum non dum marmor crustataque tecta ferebat\nIpse locus templi, gemmiferasque trabes.\nCana fides mundo viguit, cum paupere cultu\nStabat in exigua ferreus aede calix.\nTunc viguit virtus, tunc nos Astraea colebat\nInque suo pretio docta Minerva fuit.\nPontificum at postquam paupertas sobria cessit\nEt capiat luxus quos sacer ornat honos.\nNullum crimen abest, facinusque cupidinis, atque\nAurum omnes pulsa iam pietate colunt.\nVicta fugit bonitas aurum veneramur in orbe\nAuro lex cessit, mox sine lege pudor.\nAuro pulsa fides, auro caelestia dona\nMercantur, tanta est ambitiosa fames.\nAt sunt iam plures qui iusta vocabula turpi\nPraetendunt sceleri et talia verba vomunt.\nEmptor ego non sum, sed munus munere penso\nSic homines lusos credit et ipse deos.\nStulte quid insanis? Christus speculatur ab alto\nSingula corda hominum, fallier atque nequit.\nMortales circumvolitans simul omnia Pluto\nDefert aeterno caelicolumque deo.\nEt tristes queritur mores; et debita poscit\nSupplicia, o miseros quos scelera atra tenent.\nIudicii extremi memores esto fideles\nNe vos praecipites naufraga Syrtis agat.","prev":{"citation":"Opuscula nova 4.16","label":"Querimonia puellarum in Luciferum, qui graece Phosphorus dicitur.","url":"https://interlinea.aeterna-institute.org/library/latin/bebel/opuscula-nova/4.16","api":"https://interlinea.aeterna-institute.org/api/v1/library/latin/bebel/opuscula-nova/4.16"},"next":{"citation":"Opuscula nova 4.18","label":"Contra meretricem singulis detrectantem.","url":"https://interlinea.aeterna-institute.org/library/latin/bebel/opuscula-nova/4.18","api":"https://interlinea.aeterna-institute.org/api/v1/library/latin/bebel/opuscula-nova/4.18"},"credit":{"text":"Bebel, Opuscula nova. Text: CAMENA (Universität Mannheim), CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/nevenjovanovic/camena-neolatinlit/blob/771bb7f96826dfacdd920e48b8dfb2c33c52efe7/poemata/bebelopuscula_1.xml","quality":"ocr"}}