{"kind":"section","lang":"la","language":"Latin","title":"Regula 11.25","citation":"Benedict, Regula 11.25","ref":"11.25","level":null,"urn":null,"url":"https://interlinea.aeterna-institute.org/library/latin/benedict/regula/11.25","api":"https://interlinea.aeterna-institute.org/api/v1/library/latin/benedict/regula/11.25","markdown":"https://interlinea.aeterna-institute.org/library/latin/benedict/regula/11.25.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":279,"text":"Quod si contigerit, digne inde satisfaciat Deo in oratoria per cujus evenerit neglectum.] Qualis esse debeat illa satisfactio subticuit S. Benedictus, sed eant aperiunt aliquo modo commentatores: « Postquam completum fuerit matutinum, inquit Hildemarus, et postquam exierint, sive intraverint hebdomadarii coquinae, ille per cujus evenerit neglectum tandiu debet stare in curvum ante altare quoadusque fratres exeant foras. » Et Boherius: « Erit ibi prostratus in terram tandiu, donec arbitrio abbatis fuerit satisfactum; vel non imponet in choro utique psalmum et antiphonam, donec, etc.; vel erit forsan haec oratorii punitio, quia non stabit in ordine suo in choro, sed in loco in quo aspici valeat ab omnibus confusive. » In ms. libro Usuum Beccensis monasterii decernitur: « Si contigerit ut tam tarde surgatur ad vigilias ut collecta de laudibus possit dici luce dici, debent omnes sacristae satisfacere ibi in oratorio, ubi beatus jubet Benedictus. Dum dicitur ad laudes Kyrie eleison, prosternantur in choro et jaceant ibi donec dicat sacerdos post collectam Per Dominum. Post hanc satisfactionem non faciant aliam, quam qui facere voluerit, in capitulo debet emendari. » Bernardus Cassinensis et Nicolaus de Fractura existimant hoc in abbatis arbitrio esse relictum. Quidquid sit, certe duo hic dicit S. Benedictus: 1° ut digna sit satisfactio, digne inde satisfaciat, id est secundum gravitatem aut levitatem negligentiae; nam cujus major est negligentia, ex Hildemaro non solum ad matutinum, sed etiam ad primam vel tertiam satisfacere debet: cujus minor, ad matutinum duntaxat: gravitas autem negligentiae, ex eodem Hildemaro, repetitur vel ex temporis prolixitate, quo tardius surrexerunt, vel ex affectu et intentione fratris negligentis; 2° ut satisfactio fiat in oratorio, « … quia in omnibus fratribus negligenter agens deliquit, infit Smaragdus, ab omnibus satisfaciens videatur, et pro ejus delicto omnibus Cunctipotentis imploretur misericordia. »","prev":{"citation":"Regula 11.24","label":"Chapter 11","url":"https://interlinea.aeterna-institute.org/library/latin/benedict/regula/11.24","api":"https://interlinea.aeterna-institute.org/api/v1/library/latin/benedict/regula/11.24"},"next":{"citation":"Regula 12.287.1-31","label":"12.287.1 to 12.287.31","url":"https://interlinea.aeterna-institute.org/library/latin/benedict/regula/12.287.1","api":"https://interlinea.aeterna-institute.org/api/v1/library/latin/benedict/regula/12.287.1"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}