{"kind":"section","lang":"la","language":"Latin","title":"Regula 13.294.1-20","citation":"Benedict, Regula 13.294.1-20","ref":"13.294.1","level":null,"urn":null,"url":"https://interlinea.aeterna-institute.org/library/latin/benedict/regula/13.294.1","api":"https://interlinea.aeterna-institute.org/api/v1/library/latin/benedict/regula/13.294.1","markdown":"https://interlinea.aeterna-institute.org/library/latin/benedict/regula/13.294.1.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":280,"text":"Privatis diebus qualiter matutini agantur. Diebus autem privatis matutinorum solemnitas ita agatur: id est ut sexagesimus sextus psalmus dicatur, sine antiphona, subtrahendo modice sicut dominica: ut omnes occurrant ad quinquagesimum, qui cum antiphona dicatur. Post quem alii duo psalmi dicantur secundum consuetudinem: id est, secunda feria quintus et tricesimus quintus; tertia feria quadragesimus secundus et quinquagesimus sextus; quarta feria sexagesimus tertius et sexagesimus quarius; quinta feria octogesimus septimus et octogesimus nonus; sexta feria septuagesimus quintus et nonagesimus primus; sabbato autem centesimus quadragesimus secundus et canticum Deuteronomii, quod dividatur in duas Glorias. Nam caeteris diebus canticum unumquodque die suo ex prophetis, sicut psallit Ecclesia Romana, dicatur. Post haec sequantur laudes; deinde lectio una Apostoli memoriter recitanda, responsorium, Ambrosianum, versus, canticum de Evangelio, litania: et completum est. Plane agenda matutina vel vespertina non transeat aliquando nisi in ultimo per ordinem oratio dominica, omnibus audientibus, dicatur a priore, propter scandalorum spinas quae oriri solent, ut conventi per ipsius orationis sponsionem, qua dicunt, Dimitte nobis sicut et nos dimittimus; purgent se ab hujusmodi vitio. Caeteris vero agendis ultima pars ejus orationis dicatur: ut ab omnibus respondeatur, Sed libera nos a malo. COMMENTARIUS. Diebus autem privatis matutinorum solemnitas ita agatur, id est ut sexagesimus sextus psalmus dicatur sine antiphona, subtrahendo modice sicut dominica.] Subtrahendo modice, id est non ita celeriter, seu etiam minus alte cantando, inquit Bernardus Cassinensis. Nimirum sicut ad vigilias psalmum xciv protrahendo et morose voluit dici, ita ad matutinos psalmum lxvi. Ut omnes occurrant aa quinquagesimum.] Non quidem jam incoeptum, sed inchoandum; ita ut finita Gloria psalmi lxvi, omnes jam occurrerint, tardiusque venientes satisfaciant, uti post Hildemarum exponit Bernardus Cassinensis. Qui cum antiphona dicatur.] De antiphonis ad reliquos psalmos nihil dicit S.","prev":{"citation":"Regula 12.287.111-136","label":"12.287.111 to 12.287.136","url":"https://interlinea.aeterna-institute.org/library/latin/benedict/regula/12.287.111","api":"https://interlinea.aeterna-institute.org/api/v1/library/latin/benedict/regula/12.287.111"},"next":{"citation":"Regula 13.294.21-42","label":"13.294.21 to 13.294.42","url":"https://interlinea.aeterna-institute.org/library/latin/benedict/regula/13.294.21","api":"https://interlinea.aeterna-institute.org/api/v1/library/latin/benedict/regula/13.294.21"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}