{"kind":"section","lang":"la","language":"Latin","title":"Regula 20.337.1-47","citation":"Benedict, Regula 20.337.1-47","ref":"20.337.1","level":null,"urn":null,"url":"https://interlinea.aeterna-institute.org/library/latin/benedict/regula/20.337.1","api":"https://interlinea.aeterna-institute.org/api/v1/library/latin/benedict/regula/20.337.1","markdown":"https://interlinea.aeterna-institute.org/library/latin/benedict/regula/20.337.1.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":290,"text":"De reverentia orationis. Si cum hominibus potentibus volumus aliqua suggerere, non praesumimus nisi cum humilitate, et reverentia: quanto magis Domino Deo universorum, cum omni humilitate, et puritatis devotione supplicandum est? Et non in multiloquio, sed in puritate cordis, et compunctione lacrymarum n…s exaudiri sciamus. Et ideo brevis debet esse et pura oratio, nisi forte ex affectu inspirationis divinae gratiae protendatur. In conventu tamen, omnino brevietur oratio; et facto signo a priore, omnes pariter surgant. COMMENTARIUS. Si cum hominibus potentibus volumus aliqua suggerere, etc.] Familiaris quidem comparatio, sed eo ad persuadendum efficacior, quo familiaris magis ac nota. Eadem utuntur Tertullianus, in lib. de Orat.; S. Basilius, in Regul. brevior., interrog. 201; Cassianus, collat. 23, c. 7; Evagrius. in Monachicis, n. 11, tom. … Monum. Eccl. Graec.; S. Eligius, hom. 9; Haymo Halberstatensis, I. de Varietate, c. 20; Magister, in Regula, c. 48; Grimlaicus, in Regula Solit., c. 31, ubi etiam integrum fere hoc caput describit. Quanto magis Domino Deo universorum cum omni humilitate, et puritatis devotione supplicandum est.] Cum omni, inquit, humilitate, id est corporis et animae, ait Hildemarus: addit Bernardus Cassinensis, et oris; utraque enim necessaria est, utramque etiam laudat S. P. Benedictus cap. 7. Merito autem orare volenti S. Pater virtutem commendat humilitatis, quia Deus respicit in orationem humilium, et non spernit preces eorum: unde S. Joannes Climacus (Grad. 7; vide S. Bern., serm. 25 de Divers.): « Dum das operam precibus, …ta coram judice tremebundus, non secus ac reus, ut humili corporis statu foris, et animi intus, justi judicis iram exstinguas: non enim potest animam tanquam viduam dolenter coram se stantem, et importune, quamvis ipse infatigabilis, precibus fatigantem spernere. » Addit S. Benedictus et puritatis devotione, quam in cordis simplicitate constituit Bernardus Cass., juxta illud: In simplicitate cordis quaerite illum.","prev":{"citation":"Regula 19.328.185","label":"Chapter 19","url":"https://interlinea.aeterna-institute.org/library/latin/benedict/regula/19.328.185","api":"https://interlinea.aeterna-institute.org/api/v1/library/latin/benedict/regula/19.328.185"},"next":{"citation":"Regula 20.337.48-69","label":"20.337.48 to 20.337.69","url":"https://interlinea.aeterna-institute.org/library/latin/benedict/regula/20.337.48","api":"https://interlinea.aeterna-institute.org/api/v1/library/latin/benedict/regula/20.337.48"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}