{"kind":"section","lang":"la","language":"Latin","title":"Regula 20.337.94-125","citation":"Benedict, Regula 20.337.94-125","ref":"20.337.94","level":null,"urn":null,"url":"https://interlinea.aeterna-institute.org/library/latin/benedict/regula/20.337.94","api":"https://interlinea.aeterna-institute.org/api/v1/library/latin/benedict/regula/20.337.94","markdown":"https://interlinea.aeterna-institute.org/library/latin/benedict/regula/20.337.94.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":293,"text":"Illa compunctio perfecta, quae pellit a se omnem delectationem carnalium rerum, et toto studio mentis figit intentionem in contemplatione Dei. » Quibus verbis quasi duo distinguit compunctionis genera, quorum unum est in moerore pro nostris excessibus, alterum in exsultatione pro divinis muneribus, ut loquitur S. Bernardus (Serm. 66 in Cant.): quae Grimlaicus in Regula solitariorum (Cap. 30) vocat irriguum superius, et irriguum inferius. Porro ex S. Gregorio (Lib. xxiii Moral., cap. 13) « quatuor sunt qualitates quibus viri justi anima in compunctione vehementer afficitur: cum aut malorum suorum reminiscitur, considerans ubi fu…; aut judiciorum Dei sententiam metuens, et secum quaerens cogitat ubi erit; aut cum mala vitae praesentis solerter attendens, moerens considerat ubi est; aut cum bona supernae patriae contemplatur, quae quia necdum adipiscitur, lugens conspicit ubi non est. » Idem videre est in praefato libro de Modo vivendi, cap. 10, et in Regula solitar., cap. 29. Alias compunctionis causas enarrat Cassianus collat. 9, cap. 26. Vide Petri Damiani opusc. 15, cap. 26. Et ideo brevis esse debet et pura oratio.] Quantum ad tempus et quantum ad verba, inquiunt Bernardus Cassin. et Boherius. Idem monet vulgatum Syntagma doctrinae S. Athanasii ad monachos: « Per diem frequenter ora, et assidue; attamen sine longa orationis extensione, sine clamore, aut multiloquio mani. » Idque monachorum AEgyptiorum exemplo, qui, ut dicit Cassianus (Lib. ii, cap. 10), utilius censebant breves quidem orationes, sed creberrimas fieri: de quibus etiam S. Augustinus in epistola ad Probam (Epist. 130): « Dicuntur fratres in AEgypto crebras quidem habere orationes, sed eas tamen brevissimas, et raptim quodammodo jaculatas, ne illa vigilanter erecta, quae oranti plurimum necessaria est, per productiores moras evanescat atque hebetetur intentio; ac per hoc etiam ipsi satis ostendunt hanc intentionem sicut non est obtundenda, si perdurare non po…est, ita si perduraverit, non cito esse rumpendam.","prev":{"citation":"Regula 20.337.70-93","label":"20.337.70 to 20.337.93","url":"https://interlinea.aeterna-institute.org/library/latin/benedict/regula/20.337.70","api":"https://interlinea.aeterna-institute.org/api/v1/library/latin/benedict/regula/20.337.70"},"next":{"citation":"Regula 20.337.126-152","label":"20.337.126 to 20.337.152","url":"https://interlinea.aeterna-institute.org/library/latin/benedict/regula/20.337.126","api":"https://interlinea.aeterna-institute.org/api/v1/library/latin/benedict/regula/20.337.126"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}