{"kind":"section","lang":"la","language":"Latin","title":"Regula 21.340.1-29","citation":"Benedict, Regula 21.340.1-29","ref":"21.340.1","level":null,"urn":null,"url":"https://interlinea.aeterna-institute.org/library/latin/benedict/regula/21.340.1","api":"https://interlinea.aeterna-institute.org/api/v1/library/latin/benedict/regula/21.340.1","markdown":"https://interlinea.aeterna-institute.org/library/latin/benedict/regula/21.340.1.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":279,"text":"De decanis monasterii. Si major fuerit congregatio, eligantur de ipsis fratres honi testimonii et sanctae conversationis, et constituantur decani: qui sollicitudinem gerant super decanias suas in omnibus, secundum mandata Dei et praecepta abbatis sui. Qui decani tales eligantur in quibus securus abbas partiatur onera sua. Et non eligantur per ordinem, sed secundum vitae meritum et sapientiae doctrinam. Quique decani si ex eis aliqua forte quis inflatus superbia repertus fuerit reprehensibilis, correptus semel, et iterum, et tertio, si emendare noluerit, dejiciatur; et alter in loco ejus, qui dignus est, subrogetur. Et de praeposito eadem constituimus. COMMENTARIUS. Ea est virorum prudentissimorum agendi ratio, ut in rebus duris et arduis propriis diffidant viribus, et oneris quod sibi portandum incumbit, saltem partem aliquam in alienos deponant humeros: quapropter cum ars artium sit regimen animarum, nihilque tam arduum ac difficile existat quam multorum servire moribus; praepositum in monasterio, aliosque, ubi fratrum major est numerus, decanos S. P. Benedictus una cum abbate eligi curavit, quibus ille securus onera partiretur, ut ab iis adjutus, et ipse aequo animo impleret officium sibi commissum. Horum de nomine primum, deinde Regulae textum exponendo de muniis agendum. Itaque decani vocabulum nomen est militiae, a castris in claustra translatum; nam « erant decani decem militibus praepositi, qui nunc caput contubernii vocantur, » inquit Vegetius (De Re milit, cap. 8): unde S. Isidorus (Lib. iii Orig. c. 3): « Et decani eo quod decem militibus praeficiantur. » In monasteriis vero decanus dicebatur qui novem monachis decimus praeesset, ut docet S. Hieronymus (Epist. 22); vel potius qui esset denis praepositus, ut habet S. Augustinus (Lib. i de Mor. Eccl. c. 31), et maxime junioribus, uti colligitur ex hoc Cassiani loco: « Alii traditur seniori, qui decem junioribus praeest;","prev":{"citation":"Regula 20.337.258","label":"Chapter 20","url":"https://interlinea.aeterna-institute.org/library/latin/benedict/regula/20.337.258","api":"https://interlinea.aeterna-institute.org/api/v1/library/latin/benedict/regula/20.337.258"},"next":{"citation":"Regula 21.340.30-59","label":"21.340.30 to 21.340.59","url":"https://interlinea.aeterna-institute.org/library/latin/benedict/regula/21.340.30","api":"https://interlinea.aeterna-institute.org/api/v1/library/latin/benedict/regula/21.340.30"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}