{"kind":"section","lang":"la","language":"Latin","title":"Regula 22.345.261-280","citation":"Benedict, Regula 22.345.261-280","ref":"22.345.261","level":null,"urn":null,"url":"https://interlinea.aeterna-institute.org/library/latin/benedict/regula/22.345.261","api":"https://interlinea.aeterna-institute.org/api/v1/library/latin/benedict/regula/22.345.261","markdown":"https://interlinea.aeterna-institute.org/library/latin/benedict/regula/22.345.261.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":289,"text":"tum etiam propter honestatem majoremque silentii ac solitudinis observantiam; sive etiam ut aliquam coelestis domus imaginem monasteria referant, sicuti de Carthusianis belle dicebat Petrus Blesensis (Epist. 86): « Ad exemplar siquidem domus illius de qua scriptum est: In domo Patris mei mansiones multae sunt; habet unusquisque cel…ulam et mansiunculam suam, ut contemplationi et orationi liberius vacet. » Neque vero ita recens aut nova est isthaec institutio, quasi antiquis monachis non fuerit in usu; nam AEgyptii, teste S. Hieronymo (Epist. 22), « manebant separati, sed junctis cellulis: » unde Cassianus (Lib. ii, cap. 12): « Cum fuerint, inquit, canonicarum orationum functiones ex more finitae, unusquisque ad suam recurrens cellulam, quam aut solus, aut cum alio tantum inhabitare permittitur, etc. » Idem institutum imitati sunt in Galliis Lerinenses monachi, ut discimus ex Eucherii epist. ad Hilarium de Laude vitae solitariae, ubi inter alias Lerinensis insulae laudes haec scribit: « Haec nunc habet sanctos senes illos qui divisis cellulis AEgyptios Patres Galliis nostris intulerunt. » Eamdem disciplinam arripuisse Agaunenses monachos patet ex vetustissimo scriptore Vitae S. Romani abbatis Jurensis apud Bollandum (28 Feb.), in cujus praefatione, quam Joanni et Armentario monachis Agaunensibus inscribit, postquam Joannem praefatum Joanni Baptistae et evangelistae comparavit, de Armentario ita subdit: « Alter vero in modum natatilis arcae dum illic in coenobio etiam, claustro peculiaris cellae contentus, mundi turbines impactus irridet. » De Jurensi monasterio constat ex Vita S. Eugendi ejusdem loci abbatis (Saec. i Bened.), qui « refutato archimandritarum more, utilius omnes univit in medium: destructis namque mansionum aediculis, uno secum xenodochio quiescere fecit. » Ergo prius ibidem erant mansionum aediculae, in quibus quisque manebat, quas ille destruxit. Sed eas postea reparatas fuisse colligimus ex monacho Fontanellensi in Vita S. Vandregisili, qui eo in monasterio agens, « quadam nocte attentissime precibus insisteret divinis auribus offerendis in cella sibi constituta.","prev":{"citation":"Regula 22.345.218-260","label":"22.345.218 to 22.345.260","url":"https://interlinea.aeterna-institute.org/library/latin/benedict/regula/22.345.218","api":"https://interlinea.aeterna-institute.org/api/v1/library/latin/benedict/regula/22.345.218"},"next":{"citation":"Regula 22.345.281-316","label":"22.345.281 to 22.345.316","url":"https://interlinea.aeterna-institute.org/library/latin/benedict/regula/22.345.281","api":"https://interlinea.aeterna-institute.org/api/v1/library/latin/benedict/regula/22.345.281"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}