{"kind":"section","lang":"la","language":"Latin","title":"Regula 23.359.1-23","citation":"Benedict, Regula 23.359.1-23","ref":"23.359.1","level":null,"urn":null,"url":"https://interlinea.aeterna-institute.org/library/latin/benedict/regula/23.359.1","api":"https://interlinea.aeterna-institute.org/api/v1/library/latin/benedict/regula/23.359.1","markdown":"https://interlinea.aeterna-institute.org/library/latin/benedict/regula/23.359.1.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":278,"text":"De excommunicatione culparum. Si quis frater contumax, aut inobediens, aut superbus, aut murmurans, vel in aliquo contrarius exsistens sanctae Regulae, et praeceptis seniorum suorum, contemptor repertus fuerit, hic secundum Domini nostri praeceptum admoneatur semel, et secundo secrete a senioribus suis. Si non emendaverit, objurgetur publice coram omnibus. Si vero neque sic correxerit, si intelligit qualis poena sit, excommunicationi subjaceat. Si autem improbus est, vindictae corporali subdatur. COMMENTARIUS Si quis frater contumax, aut inobediens, etc.] Sex aut quinque causas casusve pro diversa lectionum interpunctione assignat, in quibus excommunicationis poena inuri debeat. Prima est, si quis frater contumax sit. Quid vero sit contumax ita exponunt auctores. Hildemarus: « Ille, inquit, est contumax qui contemnit facere in prima fronte quod imperatur: verbi gratia cum dicitur illi, Fac hoc, et ille contumax dicit. Non facio. » Bernardus Cassinensis et Boherius: « Contumacia dicitur illa qua quis citatus ut veniat, non comparet; aut si comparuerit, in judicio non procedit: hic autem aliter assumitur contumacia, quando videlicet correptus de aliqua specie mali, superbe respondet, et resistit in facie corrigenti. » Nicolaus de Fractura: « Sciendum est quod multiplex est contumacia, et multipliciter quis dicitur contumax, cum jussus restituere non restituit. Item si citatus ternis edictis, vel uno peremptorio pro omnibus, ad judicium non venit; vel si venit, illicentiatus discessit. Item si jussus respondere, non respondit; vel quia respondit, si obscure respondit; quod idem est ac si non responderet. Item si venit ad judicium, et non comparet, seu latitat post columnas, habetur ac si non venisset. Hic vero aliter accipitur contumacia, videlicet cum quis secrete correptus resistere nititur corrigenti. » Richardus de S. Angelo: « Tribus modis aliquis dicitur contumax: 1° si vocatus non venit; 2° si venit et non velit obedire;","prev":{"citation":"Regula 22.353.139-150","label":"22.353.139 to 22.353.150","url":"https://interlinea.aeterna-institute.org/library/latin/benedict/regula/22.353.139","api":"https://interlinea.aeterna-institute.org/api/v1/library/latin/benedict/regula/22.353.139"},"next":{"citation":"Regula 23.359.24-55","label":"23.359.24 to 23.359.55","url":"https://interlinea.aeterna-institute.org/library/latin/benedict/regula/23.359.24","api":"https://interlinea.aeterna-institute.org/api/v1/library/latin/benedict/regula/23.359.24"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}