{"kind":"section","lang":"la","language":"Latin","title":"Regula 3.99.80-97","citation":"Benedict, Regula 3.99.80-97","ref":"3.99.80","level":null,"urn":null,"url":"https://interlinea.aeterna-institute.org/library/latin/benedict/regula/3.99.80","api":"https://interlinea.aeterna-institute.org/api/v1/library/latin/benedict/regula/3.99.80","markdown":"https://interlinea.aeterna-institute.org/library/latin/benedict/regula/3.99.80.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":287,"text":"« Quod consilium unusquisque dederit libenter audiat, et postea in secreto cum senioribus tantum fiatribus qui utilius quive inutilius consilium dedit, subtiliter et acute discernat, » inquit Smaragdus. Rem paulo fusius exponit Hildemarus. Hic tradit in primis abbatem auditis fratrum sententiis, cum senioribus tribus quatuorve diebus tractare debere, cumque illis fratrum expendere consilia, deinde libratis omnium consiliis, iterum convocatis in capitulo fratribus dicere: Tractavimus consilia vestra, nec potuimus invenire melius aliquod quam istud; quare volo ut fiat; « ui omnes debent obedire. Aut si nullum ex omnibus fratrum consiliis aptum potuerit invenire, suum ipse proferre; cui si fratres non assentiant, tandem et suum et fratrum excutere consilium, libratis utrinque rationibus, et tunc demum quod melius perspexerit facere. In hujusmodi autem examine expendat abbas « quid liceat secundum aequitatem, quid deceat secundum honestatem, quid expediat secundum utilitatem, » ut ait Innocentius III. Et quod utilius judicaverit esse faciat.] Ita ut bono melius, meliori praeferat optimum. Itaque consilium fratrum in dubiis rebus ab abbate exposci jubet S. Benedictus, non consensum; resque ita se habebat temporibus Smaragdi atque Hildemari, qui tantummodo volunt abbatem cum senioribus librare atque expendere fratrum consilia, non exspectato eorum nee seniorum consensu. Idem docet S. Bernardus ad monachos Majoris Monasterii sic scribens (Epist. 387): « Quid quod abbas statuerit cum consilio seniorum stare non debet, si non omnes consenseritis? Itane in regula vestra manifestam super hoc sententiam aut non attenditis, aut contemnitis? Mandat siquidem ut fratres ad consilium vocati singuli sic respondeant quod senserint, quatenus defendere non praesumant quod responderint, sed abbas auditis singulorum sententiis, quam potissimum elegerit ei omnes sine contradictione acquiescant, etc. » Postea tamen aliquos tam latae abbatum potestati limites apponere visum est: unde nonnulli nunc occurrunt casus, in quibus haud potest pro suo libito absque fratrum assensu quidquam disponere.","prev":{"citation":"Regula 3.99.59-79","label":"3.99.59 to 3.99.79","url":"https://interlinea.aeterna-institute.org/library/latin/benedict/regula/3.99.59","api":"https://interlinea.aeterna-institute.org/api/v1/library/latin/benedict/regula/3.99.59"},"next":{"citation":"Regula 3.99.98-124","label":"3.99.98 to 3.99.124","url":"https://interlinea.aeterna-institute.org/library/latin/benedict/regula/3.99.98","api":"https://interlinea.aeterna-institute.org/api/v1/library/latin/benedict/regula/3.99.98"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}