{"kind":"section","lang":"la","language":"Latin","title":"Regula 44.590.201-222","citation":"Benedict, Regula 44.590.201-222","ref":"44.590.201","level":null,"urn":null,"url":"https://interlinea.aeterna-institute.org/library/latin/benedict/regula/44.590.201","api":"https://interlinea.aeterna-institute.org/api/v1/library/latin/benedict/regula/44.590.201","markdown":"https://interlinea.aeterna-institute.org/library/latin/benedict/regula/44.590.201.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":218,"text":"Quoscunque pueros magister in judicio miserit, prior potest eos absolvere sine licentia magistri. Nullus debet alius quidquam nec signum, nec ullam rem praecipere; sed tantum ille qui tenet ordinem, si ei visum fuerit ut absolvantur, signum magistro faciat, ut absolvantur. Si domnus abbas mittit fratrem in judicium, si pergit alicubi, obliviscens eum absolvere, prior non valet absolvere eum. Et quando prior miserit in judicio, decanus non potest absolvere eum, nisi per suam licentiam. » Hactenus S. P. Benedictus ejusque discipuli de satisfactione excommunicatorum. Quid vero alii? S. Isidorus (Cap. 18): « Satisfactio, inquit, delinquentium haec est: Fratribus in ecclesia constitutis, peracto poenitentiae tempore, solvet statim cingulum, extra chorum humo prostratus, quousque celebritas expleatur. Cumque jussum fuerit ab abbate, de terra consurget, ingrediensque chorum oret. Post haec data oratione pro eo ab abbate, et respondentibus cunctis amen, surget; atque omnibus pro negligentia veniam poscat, adepturus indulgentiam post hujus emendatoriae satisfactionis censuram. » S. Fructuosus (Cap. 14): « Cum excommunicatur vel arguitur quisquam pro negligentia sua, exercebi humilitatem quousque percipiat orationem, nec se audebit inter alios commiscere, vel cuiquam occulte jungere; sed omnibus ad orationum studia convenientibus, ille prostratus humo, cingulo opertorioque sublato, poscet veniam negligentiae suae. Hoc etiam his ab officio egredientibus exhibebit. Similiter quoque et refectionis tempore coram refectorio astabit, vultu deposito et habitu, quousque fratrum compassione solutus, veniam percipiat quam deposcit. »","prev":{"citation":"Regula 44.590.182-200","label":"44.590.182 to 44.590.200","url":"https://interlinea.aeterna-institute.org/library/latin/benedict/regula/44.590.182","api":"https://interlinea.aeterna-institute.org/api/v1/library/latin/benedict/regula/44.590.182"},"next":{"citation":"Regula 44.595","label":"Chapter 44","url":"https://interlinea.aeterna-institute.org/library/latin/benedict/regula/44.595","api":"https://interlinea.aeterna-institute.org/api/v1/library/latin/benedict/regula/44.595"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}