{"kind":"section","lang":"la","language":"Latin","title":"Regula 5.22.1-21","citation":"Benedict, Regula 5.22.1-21","ref":"5.22.1","level":null,"urn":null,"url":"https://interlinea.aeterna-institute.org/library/latin/benedict/regula/5.22.1","api":"https://interlinea.aeterna-institute.org/api/v1/library/latin/benedict/regula/5.22.1","markdown":"https://interlinea.aeterna-institute.org/library/latin/benedict/regula/5.22.1.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":341,"text":"Nam cum malo animo.] Id est tristi, invito, aut murmuranti. Obediat discipulus, etc.] Haec plana sunt. Et pro tali facto nullam consequitur gratiam.] Hinc colliges quantum sit murmuratio peccatum, cujus causa praemio et mercede privantur ipsa etiam optima obedientiae opera. Imo et poenam incurrit murmurantium, etc.] Quintuplici in Scripturis poena reperitur Deus muletasse murmurium: 1° lepra, ut in Maria sorore Mosis; 2° igne coelesti, tabernacula murmurantium devorante; 3° hiatu terrae, Core, Datan et Abiron absorbente; 4° ignito serpente, murmurantes filios Israel occidente; 5° exclusione a terra promissionis. Quorum « terrorem cum evacuatione praemii obedientiae incutit B. Benedictus murmurantibus, » inquit Bernardus Cassinensis, cujus expositionem rejicere videtur Boherius hunc in locum sic disserens: « Quidam hoc exponunt de quintuplici poena, quam quidam murmurantes acriter pertulerunt in veteri Testamento, ut fuit leprae incursio, etc.... Sed absit quidem quod Magister, qui dulcem nobis assignavit Regulam, rigorem veterem et non gratiam in hoc tempore gratiae fuerit imprecatus, » etc. Ejus sententiae astipulari videtur Richardos de S. Angelo, ita scribens: « Poena istorum erit ad arbitrium abbatis, cum hic non sit statuta, vel dicas quod procedet contra istos secundum modum, positum infra de excommunicatione culparum. Similiter Nicolaus de Fractura: « Poena erit ista: secundum Domini nostri praeceptum debet admoneri semel et iterum, et secundo secrete a senioribus suis; si non emendaverit, objurgetur publice coram omnibus; si vero neque sic correxerit, si intelligit qualis poena sit, excommunicationi subjaceat; sin autem improbus est, vindictae corporali subjaceat: sic delinit Magister infra de Excommunicatione culparum. » Videtur tamen hic S. Benedictus loqui de poena a Deo inferenda, sicut de mercede ab eo eroganda, qua murmuriosi privantur, ac proinde Bernardi sententia praeferenda, quam ab Hildemaro et Smaragdo accipere potuit. Et certe S. Pater hic agit de poena murmurantibus non solum ore, sed etiam corde debita: at unus Deus cordis secreta agnoscit, non abbas, aut quivis alius homo: non ergo de poena regulari superiori arbitraria hic locus intelligendus est, sed de vindicta Dei justa, occultiora quae lumen oculorum ejus non latent judicantis: quod tamen non sic capi velim, quasi Deus omne murmurium lep…, igne coelesti, terrae hiatu, etc., puniret;","prev":{"citation":"Regula 5.21","label":"Chapter 5","url":"https://interlinea.aeterna-institute.org/library/latin/benedict/regula/5.21","api":"https://interlinea.aeterna-institute.org/api/v1/library/latin/benedict/regula/5.21"},"next":{"citation":"Regula 5.22.22-51","label":"5.22.22 to 5.22.51","url":"https://interlinea.aeterna-institute.org/library/latin/benedict/regula/5.22.22","api":"https://interlinea.aeterna-institute.org/api/v1/library/latin/benedict/regula/5.22.22"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}