{"kind":"section","lang":"la","language":"Latin","title":"Regula 55.697.987-1011","citation":"Benedict, Regula 55.697.987-1011","ref":"55.697.987","level":null,"urn":null,"url":"https://interlinea.aeterna-institute.org/library/latin/benedict/regula/55.697.987","api":"https://interlinea.aeterna-institute.org/api/v1/library/latin/benedict/regula/55.697.987","markdown":"https://interlinea.aeterna-institute.org/library/latin/benedict/regula/55.697.987.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":203,"text":"» Huic sagi acceptioni concinit Bernardus Cassinensis his verbis: « Puto secundum intellectum modernum sagum istud esse, quod continet paleas, vel fenum, et hoc vulgari hujus regni concordat. » Idem habet Nicolaus de Fractura; eoque sensu sumitur in antiqua Vita S. Eugendi abbatis Jurensis, in qua haec lego: « Paleis vero lectuli in eremo lectis, multo tempore, vilique sagello constrictis, pellicioque superposito conquievit. » (Ubi etiam obiter observandum est lectorum omnium fenum ex statutis Lanfranci, singulis annis esse renovandum: idque inter festivitatem S. Joannis et SS. Apostolorum Petri et Pauli, uti praescribunt Consuetudines S. Benigni, c. 43.) Existimat tamen Haeftenus sagum esse monachalis lecti operimentum, monachi enim in ipsa matta cubabant; cui consentit Guido Juvenalis sagum Gallice vertens une grosse sarge velue à mettre sur le matteras. Laena.] Quae Hildemaro dicitur « toga duplex, seu vestis regia; » et Smaragdo « species vestis villosa est, quam nos toxam vocamus; alii vero galnapem eam vocant. » Galnapis autem seu galbanis est stragulum villosum, quod frigori resistere possit. Atque hoc sensu hic a S. Benedicto sumi censent Bernardus Cassinensis, Nicolaus de Fractura, Richardus a S. Angelo, Boherius, Turrecremata, Menardus, et Haeftenus. Laenas tamen cum sagis confundere videtur anonymus Dunelmensis in lib. de Transl. et Mirac. S. Cuthberti cap. 1, saec. iv Bened., part. ii.","prev":{"citation":"Regula 55.697.954-986","label":"55.697.954 to 55.697.986","url":"https://interlinea.aeterna-institute.org/library/latin/benedict/regula/55.697.954","api":"https://interlinea.aeterna-institute.org/api/v1/library/latin/benedict/regula/55.697.954"},"next":{"citation":"Regula 55.722.1-33","label":"55.722.1 to 55.722.33","url":"https://interlinea.aeterna-institute.org/library/latin/benedict/regula/55.722.1","api":"https://interlinea.aeterna-institute.org/api/v1/library/latin/benedict/regula/55.722.1"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}