{"kind":"section","lang":"la","language":"Latin","title":"Regula 57.13","citation":"Benedict, Regula 57.13","ref":"57.13","level":null,"urn":null,"url":"https://interlinea.aeterna-institute.org/library/latin/benedict/regula/57.13","api":"https://interlinea.aeterna-institute.org/api/v1/library/latin/benedict/regula/57.13","markdown":"https://interlinea.aeterna-institute.org/library/latin/benedict/regula/57.13.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":313,"text":"Sed semper aliquantulum vilius detur quam a saecularibus datur.] Idem docet Evagrius in Monachicis, num. 8 (Tom. III Monument. Eccl. Graec.): « Sive ergo vendis, sive emis, parum te de justo pretio frauda: ne in mores nimium exactos, aut erga pretium lucri cupidos inductus, ad noxias animae causas decidas, etc. » Et Regula Magistri (Cap. 85): « Cum unaquaeque ars aliquid perfectum, supervacuum usibus monasterii, vel mittendarum eulogiarum abundaverit, interrogata qualitate pretii, quantum a saecularibus distrahi potest, tantum infra nummorum minori semper distrahatur pretio, ut agnoscantur in hac parte spiritales a saecularibus actibus distantiaque separari,... quae diminutio pretii aestimatione abbatis artificibus debet constitui, ut sciant item quanta ementibus summa respondeant, et accepti pretii fraudem non possint facere de ipsa quantitate jam scienti abbati. » Sed et Regula S. Stephani Grandimontensis (Cap. 16): « Annonam, vel quodlibet aliud propter expensam vestram a vobis comparatum, si charius potestis vendere quam emistis, nulla cupiditate id faciatis; hinc enim negotiatores efficeremini: imo potius quod venditis, vilius vendere, et quod emitis, charius emere vobis praecipimus, ut semper a fraude declinetis. » Atque ad hujusce statuti praxim auctor est Hildemarus, ut « si alii volunt dare pro illa re viginti denarios, tu debeas dare uno minus, id est decem et novem: et quamvis non specialiter Regula dicat, tamen subintelligitur, ut sic cum emis aliquam rem pro qua alii volunt dare viginti denarios, tu vero debes dare viginti unum. » Et Udalricus Cluniacensium Consuetudines describens (Lib. iii, c. 11): « Si quando tale quid comparaverit vel vendiderit camerarius, negotiatione sua ex toto peracta, mercatori cum quo negotiatus est, secundum quod negotium est et persona, aliquantos etiam addit vel reddit sua sponte denarios, propter illud S. Benedicti praecipientis ut res nostra semper vilius vendatur quam aliorum hominum. » Quanta religione istud observari voluerit S. Pachomius, habes in ejus Vita, apud Bolland., num. 23, et Sur. Cap. 75, Maii die 14. Vide Vitam S. Filiberti abbatis Gemmeticensis, num1. 21, saec. ii Bened.","prev":{"citation":"Regula 57.11-12","label":"57.11 to 57.12","url":"https://interlinea.aeterna-institute.org/library/latin/benedict/regula/57.11","api":"https://interlinea.aeterna-institute.org/api/v1/library/latin/benedict/regula/57.11"},"next":{"citation":"Regula 58.743.1-13","label":"58.743.1 to 58.743.13","url":"https://interlinea.aeterna-institute.org/library/latin/benedict/regula/58.743.1","api":"https://interlinea.aeterna-institute.org/api/v1/library/latin/benedict/regula/58.743.1"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}