{"kind":"section","lang":"la","language":"Latin","title":"Regula 58.757.43-68","citation":"Benedict, Regula 58.757.43-68","ref":"58.757.43","level":null,"urn":null,"url":"https://interlinea.aeterna-institute.org/library/latin/benedict/regula/58.757.43","api":"https://interlinea.aeterna-institute.org/api/v1/library/latin/benedict/regula/58.757.43","markdown":"https://interlinea.aeterna-institute.org/library/latin/benedict/regula/58.757.43.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":283,"text":"Alias formulas vide in saeculo iv Bened., tom. I, sub finem. Ut autem ad S. Regulae textum revertamur, « Per lorum promissae stabilitatis tanquam pia jumenta ad coeleste praesepium religamur; per conversionem morum pietati angelicae simulamur; per exhibitionem obedientiae ipsa angelica ministeria imitamur, » inquit Adam abbas Persenniae ad Osmundum monachum scribens (Tom. I Miscel. Baluz.), Verum quid hisce tribus votis Deo promittatur paulo fusius explicare necessum est. Licet stabilitatem loci in nonnullis professionis formulis specialiter expressam videamus, non ea tamen una sufficit ad omnes voti stabilitatis partes explendas; sed praeterea requiritur stabilitas status, seu perseverantia in arrepto vitae monasticae proposito, ut non obscure demonstrat usitata apud Cluniacenses professionis formula, qua non simpliciter stabilitas promittitur, sed stabilitas monachi; et edita ad calcem saec. iv Bened. prima petitionis formula, in qua novitius promittendam stabilitatem ita exprimit: « Stabilitatem conversationis nostrae in congregatione vestra, teste Domino, devoto animo cum observatione regulae usque in finem profitemur servare. » Atque ita forte intelligendus est locus ex Vita S. Remberti, n. 12 (Saec. iv Ben., part. i), ubi dicitur promisisse stabilitatem morum suorum. Neque aliam nobis stabilitatis notionem exhibent qui super Regulam S. P. Benedicti scripserunt auctores. Audiendus in hanc rem antiquissimus pene omnium Hildemarus: « Stabilitas, inquit, attinet ad perseverantiam.... stare enim est in coepto bono opere perseverare. Ubi animadvertendum est quia ei non perseveraverit in illo coepto opere aut desiderio, sed aut minus aliquid, aut ex toto non perseveraverit, iste talis si videatur stare in monasterio coram hominibus, tamen coram Deo non stat. » Non ergo sola sufficit stabilitas loci, nisi accesserit insuper stabilitas in coepto bono opere et desiderio perfectionis. Clarius Bernardus Cassinensis: « Per stabilitatem astringitur quod nullo modo deserat monachatum, et quod sine necessitate et superioris auctoritate non exeat monasterium.","prev":{"citation":"Regula 58.757.1-42","label":"58.757.1 to 58.757.42","url":"https://interlinea.aeterna-institute.org/library/latin/benedict/regula/58.757.1","api":"https://interlinea.aeterna-institute.org/api/v1/library/latin/benedict/regula/58.757.1"},"next":{"citation":"Regula 58.757.69-91","label":"58.757.69 to 58.757.91","url":"https://interlinea.aeterna-institute.org/library/latin/benedict/regula/58.757.69","api":"https://interlinea.aeterna-institute.org/api/v1/library/latin/benedict/regula/58.757.69"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}