{"kind":"section","lang":"la","language":"Latin","title":"Regula 58.761.296-325","citation":"Benedict, Regula 58.761.296-325","ref":"58.761.296","level":null,"urn":null,"url":"https://interlinea.aeterna-institute.org/library/latin/benedict/regula/58.761.296","api":"https://interlinea.aeterna-institute.org/api/v1/library/latin/benedict/regula/58.761.296","markdown":"https://interlinea.aeterna-institute.org/library/latin/benedict/regula/58.761.296.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":312,"text":"Quod si voluerit monasterio partem conferre, noverit quo ordine sive ipse, sive ejus oblatio suscipiatur. » Et Regula tertia SS. Patrum (Cap. 1): « Si aliquam in cellulam voluerit inferre substantiam, in mensa ponatur coram omnibus fratribus, velut Regula continet. Quod si susceptus fuerit, non solum de substantia quam intulit, sed nec de seipso ab illa judicabit hora. » Quae totidem verbis continentur in Regula sancti Macarii (Cap. 4). Idem docet sanctus Basilius in Regula a Rufino translata exemplo Jacobi et Joannis, qui patrem suum et navem in qua erant reliquerunt; et sancti Matthaei, qui vectigal ut sequeretur Christum abjecit; id quod fuse prosequitur in Regulis fus. cap. 8. Et sanctus Caesarius (Regula ad monachos c. 1, et ad virgines cap. 4): « Vestimenta, inquit, laica non ei mutentur nisi antea de facultate sua chartas venditionis suae faciat, sicut Dominus praecepit dicens: Si vis perfectus esse, vade, vende omnia quae habes, da pauperibus, et veni, sequere me. Certe si non vult vendere, donationis chartas, aut parentibus, aut monasterio faciat, dummodo liber sit, et nihil habeat proprium. » Eodem modo loquitur S. Aurelianus in Regula ad monachos, cap. 3, et ad virgines cap. 2. In Regula quoque S. Isidori lego (Cap. 4): « Qui relicto saeculo ad militiam Christi pia et salubri humilitate convertuntur, omnia sua primum aut indigentibus dividant, aut monasterio conferant; tunc enim servi Christi liberum animum divinae militiae offerunt, quando a se spei saecularis vincula cuncta praecidunt. » S. Fructuosus (Regul. monast. comm., cap. 4) etiam ad monasterium accedentes religionis obtentu vult interrogari, « utrum recte abrenuntiaverint, an non: Si omnia fecerunt quae in Evangelio voce veritatis audierunt, quae ait: Qui non renuntiaverit omnibus quae possidet, meus non potest esse discipulus. » Additque: « Quod si horum quos supra diximus, more pietatis, vel unum nummum alicubi male renuntians reliquit, statim eum foras repelli mandamus, quia non eum in apostolorum numero, sed Ana… et Saphirae sequacem videmus, » Denique Magister praescribit (Cap.","prev":{"citation":"Regula 58.761.270-295","label":"58.761.270 to 58.761.295","url":"https://interlinea.aeterna-institute.org/library/latin/benedict/regula/58.761.270","api":"https://interlinea.aeterna-institute.org/api/v1/library/latin/benedict/regula/58.761.270"},"next":{"citation":"Regula 58.761.326-330","label":"58.761.326 to 58.761.330","url":"https://interlinea.aeterna-institute.org/library/latin/benedict/regula/58.761.326","api":"https://interlinea.aeterna-institute.org/api/v1/library/latin/benedict/regula/58.761.326"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}