{"kind":"section","lang":"la","language":"Latin","title":"Regula 58.773.1-24","citation":"Benedict, Regula 58.773.1-24","ref":"58.773.1","level":null,"urn":null,"url":"https://interlinea.aeterna-institute.org/library/latin/benedict/regula/58.773.1","api":"https://interlinea.aeterna-institute.org/api/v1/library/latin/benedict/regula/58.773.1","markdown":"https://interlinea.aeterna-institute.org/library/latin/benedict/regula/58.773.1.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":287,"text":"S. Benedictus autem aut pauperibus erogari, aut facta solemniter donatione, monasterio conferri hona novitiorum constituit: sed postremum istud summa districtione cavebant Tabennenses Aegyptiique monachi, qui, ut scribit Cassianus (Lib. iv, c. 4), « idcirco ne usibus quidem coenobii profuturas suscipere ab co (novitio) pecunias acquiescunt. Primum ne confidentia hujus oblationis inflatus nequaquam se pauperioribus fratribus coaequare dignetur. Tum ne per hanc oblationem nullatenus ad humilitatem Christi descendens, cum sub disciplina coenobii non potuerit perdurare, egressus exinde, ea quae in principio renuntiationis suae spirituali fervore succensus intulerat, tepefactus postea, non sine injuria monasterii, sacrilego spiritu recipere atque exigere moliatur; quod omnimodis observari debere multis sunt experimentis frequenter educti: nam per alia minus cauta monasterii simpliciter quidam suscepti, eorum quae intulerant, quaeque in Dei opere fuerant dispensata, cum ingenti post blasphemia redhibitionem poscere tentaverunt. » Eadem ratione S. Fructuosi Regula monastica communis jubet (Cap. 18), ut « nihil de pristinis facultatibus in eumdem focum, ubi ingredi se petit monasterium, vel ad unum nummum recipiatur; sed et ipse manu sua cuncta pauperibus eroget, et postmodum comprobatus monasterium sub regula introducatur. » His accedere videtur S. Basilius, qui nulla monasterii facta mentione, pauperibus distribuenda esse bona novitii tantum asserit. Non desunt tamen, et quidem majori numero monachorum regulae, quae Benedictinae concinant, ut Regula SS. Serapionis, Macarii, Paphnutii, et alterius Macarii, Regula tertia SS. Patrum, S. Caesari, S. Aureliani Tarnatensis, S. Isidori, et Magistri: imo S. Caesarius parentibus, S. Aurelianus cui novitio placuerit bona ejus distribui permittunt, id quod olim magna animi constantia facere recusavit S. Filibertus (In ejus Vita, saec., ii Ben.), qui ad S. Agilum Resbacum veniens, « quidquid habere potuit in eleemosynam erogavit, nec quidquam exinde amicis vel parentibus gratis aliquid tribuit; sed totum ac si regalia negotia sibi credita caute et fideliter dispensavit.","prev":{"citation":"Regula 58.761.326-330","label":"58.761.326 to 58.761.330","url":"https://interlinea.aeterna-institute.org/library/latin/benedict/regula/58.761.326","api":"https://interlinea.aeterna-institute.org/api/v1/library/latin/benedict/regula/58.761.326"},"next":{"citation":"Regula 58.773.25-63","label":"58.773.25 to 58.773.63","url":"https://interlinea.aeterna-institute.org/library/latin/benedict/regula/58.773.25","api":"https://interlinea.aeterna-institute.org/api/v1/library/latin/benedict/regula/58.773.25"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}