{"kind":"section","lang":"la","language":"Latin","title":"Regula 58.773.183-197","citation":"Benedict, Regula 58.773.183-197","ref":"58.773.183","level":null,"urn":null,"url":"https://interlinea.aeterna-institute.org/library/latin/benedict/regula/58.773.183","api":"https://interlinea.aeterna-institute.org/api/v1/library/latin/benedict/regula/58.773.183","markdown":"https://interlinea.aeterna-institute.org/library/latin/benedict/regula/58.773.183.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":282,"text":"sed aut servos sive famulos ad monachorum servitia deputatos, qui nec vestem, nec tonsuram monasticam ferebant, sed amputata duntaxat capillorum superfluitate, modesto induebantur habitu, et saecularia eorum negotia exsequebantur, quales sunt in nostra congregatione commissi, qui nec ita protensos ac caeteri saeculares gerunt capillos, nec ita pretiosis utuntur vestibus; de quibus S. Isidorus in Regula (Cap. 20): Ars pistoria ad laicos pertinebit; et Regula S. Fructuosi (Cap. 23): Laici foris abbatis vel praepositi mandata peragant. Hi apud Cluniacenses froco utebantur, saltem ii qui decanis villarum provisoribus serviebant, ut patet ex his Udalrici verbis (Lib. iii, c. 5): « In ipso loco decaniae famulus, qui ei cibum et potum administrat, nunquam in sola camisia administrat, vel in femoralibus solis, nisi etiam froco, vel pellicio, et caligis sit amictus. » Vel clericos intelligit saeculares, quos laicos vocat, ad distinctionem clericorum regularium seu monachorum (neque enim eos laicos appellare antiquis fuit inusitatum, cum Regula Magistri cap. 83 sacerdotes ipsos laicos vocet), id quod manifestum probatur ex Hildemaro, qui modum referens novitios nonnullis in coenobiis recipiendi, dicit primo vitae monasticae candidatum per quinque dies ad portam monasterii permansisse, deinde susceptum in cella hospitum, ubi peractis in habitu laicali duobus mensibus, ei legebatur Regula sub duobus vel tribus diebus, ad quam observandam si se parem esse testatus fuisset, tunc indutus suis bonis vestimentis, id est lorica, scuto, lancea, spatha, et balteo, in capitulum adducebatur. Post exhortatorium abbatis sermonem, si saeculo renuntiare pergebat, acceptis rursus induciis, denuo in capitulum accedebat eodem ritu; et ibi coram fratribus aut balteum et armillas, aut spatham solummodo deponebat. Jam si reverti ad saeculum omnino pernegabat, tunc ibidem abjectis aliis omnibus suis vestimentis, radebatur, atque aliis vestibus, id est clericalibus suis induebatur, ac tandem in.","prev":{"citation":"Regula 58.773.160-182","label":"58.773.160 to 58.773.182","url":"https://interlinea.aeterna-institute.org/library/latin/benedict/regula/58.773.160","api":"https://interlinea.aeterna-institute.org/api/v1/library/latin/benedict/regula/58.773.160"},"next":{"citation":"Regula 58.773.198-232","label":"58.773.198 to 58.773.232","url":"https://interlinea.aeterna-institute.org/library/latin/benedict/regula/58.773.198","api":"https://interlinea.aeterna-institute.org/api/v1/library/latin/benedict/regula/58.773.198"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}