{"kind":"section","lang":"la","language":"Latin","title":"Regula 6.185.1-30","citation":"Benedict, Regula 6.185.1-30","ref":"6.185.1","level":null,"urn":null,"url":"https://interlinea.aeterna-institute.org/library/latin/benedict/regula/6.185.1","api":"https://interlinea.aeterna-institute.org/api/v1/library/latin/benedict/regula/6.185.1","markdown":"https://interlinea.aeterna-institute.org/library/latin/benedict/regula/6.185.1.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":286,"text":"Cistercienses ex Jacobo de Vitriaco integram in colloquio horam insumebant: « Silentium, inquit (Lib. ii Histor, Occid. cap. 14), per totam fere diem observantes, mutuis collocutionibus et collationibus unam sibi horam reservant, invicem consolantes, et invicem instruentes. » Quod ita explicat Julianus Varnier (De Ant. Praxi Regul. S, B., cap. 16), non quasi singulis diebus unam horam ad mutuam collocutionem reservarent; sed quod, cum abbas fratribus loquendi licentiam indulgeret, integram in id exercitii horam impenderent. Et de hac hora intelligendus S. Bernardus, ubi superbum monachum describens, haec habet (In Tract. de Grad. humil., c. 14): « Cum autem pulsato signo necesse est interrumpi colloquium, horam longam breve queritur intervallum. » His in colloquiis, ut id obiter observem, aliquando sermo agebatur de litteris: Si de litteris sermo exoritur, inquit S. Bernardus, vetera proferuntur et nova; volant sententiae, verba resonant ampullosa; aliquando de religione: Quod si de religione agitur, statim visiones et somnia proferuntur, deinde laudat jejunia, etc.; aliquando de rebus jocosis: Si ad ludicra sermo convertitur, in his quanto assuetior, tanto loquacior invenitur. Ex hinc colliges hujusmodi colloquia non fuisse communia, hoc est omnibus simul in unum coeuntibus, sed inter se ad proprium libitum divisis, aut ad nutum abbatis; alioquin S. Bernardus, qui fuisset praesens, si communia exstitissent, ludicra nequaquam passus fuisset. Quam frequenter autem illa hora occurreret nos latet: sanctimoniales Strictioris Observantiae ordinis Cisterciensis in Hispania (In Constit. c. 2 et 11, apud Henriq. in Liliis Cist., p. 26) semel in hebdomada extra Adventum aut Quadragesimam junctae recreationem habent ante vel post vesperas ad nutum abbatissae; dummodo dies ille non sit communionis. Similiter in antiquis Fuliensium Constitutionibus, cap. 6: « Semel tantum in hebdomada die festo fratribus aliquod ex his intervallis, quibus absunt a choro, pio et religioso colloquio consumere » permittitur….","prev":{"citation":"Regula 6.181.141-146","label":"6.181.141 to 6.181.146","url":"https://interlinea.aeterna-institute.org/library/latin/benedict/regula/6.181.141","api":"https://interlinea.aeterna-institute.org/api/v1/library/latin/benedict/regula/6.181.141"},"next":{"citation":"Regula 6.185.31-51","label":"6.185.31 to 6.185.51","url":"https://interlinea.aeterna-institute.org/library/latin/benedict/regula/6.185.31","api":"https://interlinea.aeterna-institute.org/api/v1/library/latin/benedict/regula/6.185.31"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}