{"kind":"section","lang":"la","language":"Latin","title":"Regula 6.185.141-164","citation":"Benedict, Regula 6.185.141-164","ref":"6.185.141","level":null,"urn":null,"url":"https://interlinea.aeterna-institute.org/library/latin/benedict/regula/6.185.141","api":"https://interlinea.aeterna-institute.org/api/v1/library/latin/benedict/regula/6.185.141","markdown":"https://interlinea.aeterna-institute.org/library/latin/benedict/regula/6.185.141.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":290,"text":"» Quid autem sit multiloquium explicat S. Augustinus his verbis (Lib. iii contra Crese. cap. 1): « Multiloquium est superflua locutio, vitium scilicet loquendi amore contractum. Plerumque autem loqui amant etiam qui nesciunt quid loquantur, vel quomodo loquantur. » Et alibi (Lib. i Retract., in prol.): « Absit ut multiloquium deputem, quando necessaria dicuntur, quantalibet sermonum prolixitate dicantur. » Ostendens cum solum multiloquii vitio laborare, qui multa sine necessitate; non eum qui justa ex causa, ratione sui officii, aut alterius necessitatis loquitur multa. Et alibi: Mors et vita in manibus linguae.] Potest enim occidere, aut vivificare, et eum qui loquitur, et eum cui loquitur, et eum de quo loquitur. Nam loqui et docere magistrum condecet.] Illi enim per Prophetam dicitur: Clama, ne cesses, quasi tuba exalta vocem tuam, et annuntia populo meo scelera eorum, et domui Jacob peccata eorum (Isai. lviii). Apposite autem S. Benedictus ait loqui et docere: « Id est ad hoc debet loqui ut doceat, inquit Bernardus Cassinensis: neque enim verba magistri debent esse nisi doctrina, quia qui alios admonet ad taciturnitatem, debet habere sermonem aedificativum, ratione comptum, et suo tempore suaque congruitate prolatum; unde non dixit B. Benedictus tantum: Magistrum loqui condecet, sed logui et docere, ut sit sua loquela instructio discipuli, et doctrina aedificatio ejus. » Tacere et audire discipulo convenit.] Hinc Scriptura: Audi, inquit, tacens, et pro reverentia accedet tibi bona gratia (Eccli. xxxii). Plane primus philosophiae nuncupator et creditor Pythagoras accedentes discipulos nihil ante docuit quam tacere; primaque apud eum meditatio futuro sapienti erat linguam omnem coercere: unde et quinquennii silentium discipulis imponebat; quod illi, ut profanam discerent philosophiam, muti cum gaudio persolvebant. Multo nos potiori jure, ut pote coelestis philosophiae discipulos, tacere condecet; nisi forte monachi mores et professionem exuere animus sit: « Vita enim monachi, inquit Joannes Monachus (Lib.","prev":{"citation":"Regula 6.185.121-140","label":"6.185.121 to 6.185.140","url":"https://interlinea.aeterna-institute.org/library/latin/benedict/regula/6.185.121","api":"https://interlinea.aeterna-institute.org/api/v1/library/latin/benedict/regula/6.185.121"},"next":{"citation":"Regula 6.185.165-185","label":"6.185.165 to 6.185.185","url":"https://interlinea.aeterna-institute.org/library/latin/benedict/regula/6.185.165","api":"https://interlinea.aeterna-institute.org/api/v1/library/latin/benedict/regula/6.185.165"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}