{"kind":"section","lang":"la","language":"Latin","title":"Regula 6.185.31-51","citation":"Benedict, Regula 6.185.31-51","ref":"6.185.31","level":null,"urn":null,"url":"https://interlinea.aeterna-institute.org/library/latin/benedict/regula/6.185.31","api":"https://interlinea.aeterna-institute.org/api/v1/library/latin/benedict/regula/6.185.31","markdown":"https://interlinea.aeterna-institute.org/library/latin/benedict/regula/6.185.31.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":293,"text":"Idem fere vigebat apud insignes illos eremitas quibuscum vivebat S. Dominicus Loricatus. Hi nimirum, teste Petro Damiani (In Vit. S. Domin. c. 6), « tenebant per totam hebdomadam districta censura silentium, quod utique dominica die post vesperum, cibumque solventes, habebant loquendi invicem usque ad completionis officium libertatem. » Tantam Indulgentiam suis non videntur indulsisse Cassinenses, quorum Declarationes in Regulae cap. 6, haec habent: « Ad effugiendam enervationem, praelati et alii superiores non concedant solatia aut recreationes, nisi alternis hebdomadibus, excepta tamen Quadragesima et Adventu, quibus temporibus nefas est talia cogitare, nedum permittere. » In impressis tamen anno 1642 Declarationibus, pro alternis hebdomadibus, habetur singulis hebdomadibus; et insuper tam novae quam antiquae Declarationes ad cap. 48 hortantur superiores, ut benigni sint ad recreationes fratribus, praecipue solemnitatibus duplicibus, quae non occurrunt in Adventu aut Quadragesima, concedendas. Camaldulenses (Lib. i Constit. Camald.) cum dispensant a silentio per mediam duntaxat horam per viridarium, aut aliquam aliam monasterii partem, in qua perpetuum non vigeat silentium, colloquium permittunt. Casalini quoti…lie a coena ad completorium, vel diebus jejunii a vespera etiam ad completorium colloquebantur, ita tamen ut illo tempore possent ad cellas secedere, et lectioni atque orationi vacare: post prandium vero sub silentio per mediam horam deambulabant in horto. Bursfeldenses nec diem, nec horam, nec tempus seu spatium colloquii determinatum habuisse videntur, sed in Caeremoniali hoc tantum decernunt (Dist. 3, cap. 10): « A solo abbate et priore, seu etiam subpriore in prioris absentia, loquendi licentia in monasterio aut extra concedatur, nisi forte alicui alteri pro vice aliqua speciali super hoc ab abbate et priore fuerit concessa potestas. Dans loquendi licentiam fratribus dicat: Benedicite; et illi respondeant: Deus: et ex tunc licitum erit de permissis ad invicem conferre usque ad iteratam silentii impositionem, quae fieri solet per haec verba: Adjutorium nostrum in nomine Domini.","prev":{"citation":"Regula 6.185.1-30","label":"6.185.1 to 6.185.30","url":"https://interlinea.aeterna-institute.org/library/latin/benedict/regula/6.185.1","api":"https://interlinea.aeterna-institute.org/api/v1/library/latin/benedict/regula/6.185.1"},"next":{"citation":"Regula 6.185.52-79","label":"6.185.52 to 6.185.79","url":"https://interlinea.aeterna-institute.org/library/latin/benedict/regula/6.185.52","api":"https://interlinea.aeterna-institute.org/api/v1/library/latin/benedict/regula/6.185.52"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}