{"kind":"section","lang":"la","language":"Latin","title":"Regula 64.845.82-96","citation":"Benedict, Regula 64.845.82-96","ref":"64.845.82","level":null,"urn":null,"url":"https://interlinea.aeterna-institute.org/library/latin/benedict/regula/64.845.82","api":"https://interlinea.aeterna-institute.org/api/v1/library/latin/benedict/regula/64.845.82","markdown":"https://interlinea.aeterna-institute.org/library/latin/benedict/regula/64.845.82.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":284,"text":"respondet Paulus Augustinus a Janua ex mente Regulae hoc pertinere ad abbates, et vicinos Christianos, vel episcopum loci: tandemque suam sententiam confirmat exemplo Innocentii p…pae II, qui, defuncto Honorio II, sexdecim tantum cardinalium suffragiis summus pontifex renuntiatus, Anacleto, quem paulo post unus supra viginti cardinales elegerant, praelatus est. Eadem videtur fuisse Menardi sententia, qui parvam partem interpretatur minorem, sentitque hic esse hellenismum, quo positivus pro comparativo ponitur, quod docte suo more probat. Vitae autem merito et sapientiae doctrina eligatur qui ordinandus est.] Declarat hic S. Pater qualem velit in abbatem eligi, nimirum aliquem vitae merito et sapientiae doctrina inclytum; nam, etsi « coenobitae sufficiat vitae meritum, ut loquitur Boherius, sapientiae tamen habere doctrinam convenit abbatem. » Hic enim locum habere potest illud S. Hieronymi: « Sancta rusticitas quantum ex vitae merito aedificat Ecclesiam Christi, tantum nocet, si destruentibus non resistat. » Resistere autem non potest, nisi fuerit sapientiae doctrina instructus. Quantum ergo fieri possibile est, et vitae sanctitate, et scientia fulgeat, qui in abbatem ordinandus est. Quod si talis reperiri nequeat, ex Hildemaro praestat sanctum ac pium doctrina carentem ordinare, quam doctum, qui alioqui malis sit moribus: quanquam si non sit multum malus, sed magis fragilis, potius eligendus sit vir doctus, alioqui disciplinae zelum habens, quam pius et sanctus, sed discretione carens. Porro, ut ait Bernardus Cassinensis, « vitae meritum ad conscientiae sanitatem et ad sanctorum refertur veritatem. Sapientiae vero doctrina ad prudentiam, et ad sanam intelligentiam, et ad facundam eloquentiam, et ad eminentem, vel minus competentem scientiam, et ad temporalium prudentiam potest congrue aptari. » Etiamsi ultimus fuerit in ordine congregationis.] Haec verba duplicem sortiri possunt intellectum. 1° Ut etiam ex fratribus ultimus genere, si mereatur, eligatur; neque enim ulla in his generis aut prosapiae habenda est ratio;","prev":{"citation":"Regula 64.845.60-81","label":"64.845.60 to 64.845.81","url":"https://interlinea.aeterna-institute.org/library/latin/benedict/regula/64.845.60","api":"https://interlinea.aeterna-institute.org/api/v1/library/latin/benedict/regula/64.845.60"},"next":{"citation":"Regula 64.845.97-116","label":"64.845.97 to 64.845.116","url":"https://interlinea.aeterna-institute.org/library/latin/benedict/regula/64.845.97","api":"https://interlinea.aeterna-institute.org/api/v1/library/latin/benedict/regula/64.845.97"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}