{"kind":"section","lang":"la","language":"Latin","title":"Regula 64.845.97-116","citation":"Benedict, Regula 64.845.97-116","ref":"64.845.97","level":null,"urn":null,"url":"https://interlinea.aeterna-institute.org/library/latin/benedict/regula/64.845.97","api":"https://interlinea.aeterna-institute.org/api/v1/library/latin/benedict/regula/64.845.97","markdown":"https://interlinea.aeterna-institute.org/library/latin/benedict/regula/64.845.97.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":296,"text":"unde et S. Benedictus Biscopus abbas, inter alia ad fratres monita, teste Beda (Saec. ii Ben., pag. 1007): « Hoc sedulus eisdem solebat iterare mandatum, ne quis in electione abbatis generis prosapiam, et non magis vivendi docendique probitatem putaret esse quaerendam. Et vere, inquiebat, dico vobis, quia in comparatione duorum malorum, tolerabilius mihi multo est, totum hunc locum in quo monasterium feci (si Dominus judicaverit) in solitudinem sempiternam redigi, quam ut frater meus carnalis, quem novimus viam veritatis non ingredi, in eo regendo, post me abbatis nomine succedat, etc. » 2° Ut etiam ultimus professione, si tantae sit maturitatis et prudentiae, defuncto abbati succedat: neque enim aetas in his praejudicare debet, aut gradus, ut docet Justinianus imperator in novellis 5 et 123; unde etiam Ingelardum Corbeiensem monachum, cum adhuc esset in scholis, et solum subdiaconus, Centulensi monasterio praefectum legimus circa medium saeculum x in Chronico Centulensi, lib. iii, cap. 23; Wlfetrudem Nivialensi, Austrudem Laudunensi annos duntaxat viginti natas, in utriusque Vita; Rusticulam, sive Marciam anno aetatis suae duodevigesimo Arelatensi. Quid quod Gertrudi abbatissae Hamaticensi mortuae suffecta est Eusebia duodennis, ut habetur in Vita S. Rictrudis, cap. 16? Haec tamen exempla quae proferimus, caute accipi volumus: neque enim in electionibus exhonorandum est omnino tempus, et ex eo ordo, ut dicebat Justinianus (Novella 5), nec decet omnino artis spiritalis tirunculos discipulosque statim evadere in magistros. Id vetant tam monasticae quam ecclesiasticae leges: « Nullus congregationi fratrum praefuturus eligitur, inquit Cassianus de antiquis monachis loquens (Lib. ii, c. 3), priusquam idem qui praeficiendus est quid obtemperaturis oporteat imperari obediendo didicerit, et quid junioribus tradere debeat institutis seniorum fuerit assecutus; bene enim regere, vel regi sapientis esse pronuntiant, summumque donum et gratiam S. Spiritus esse definiunt: nam neque salutaria praecepta quempiam posse obtemperantibus praestituere, nisi eum qui prius universis virtutum disciplinis fuerit instructus;","prev":{"citation":"Regula 64.845.82-96","label":"64.845.82 to 64.845.96","url":"https://interlinea.aeterna-institute.org/library/latin/benedict/regula/64.845.82","api":"https://interlinea.aeterna-institute.org/api/v1/library/latin/benedict/regula/64.845.82"},"next":{"citation":"Regula 64.845.117-146","label":"64.845.117 to 64.845.146","url":"https://interlinea.aeterna-institute.org/library/latin/benedict/regula/64.845.117","api":"https://interlinea.aeterna-institute.org/api/v1/library/latin/benedict/regula/64.845.117"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}