{"kind":"section","lang":"la","language":"Latin","title":"Regula 67.876.50-74","citation":"Benedict, Regula 67.876.50-74","ref":"67.876.50","level":null,"urn":null,"url":"https://interlinea.aeterna-institute.org/library/latin/benedict/regula/67.876.50","api":"https://interlinea.aeterna-institute.org/api/v1/library/latin/benedict/regula/67.876.50","markdown":"https://interlinea.aeterna-institute.org/library/latin/benedict/regula/67.876.50.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":284,"text":"» Sane hanc monachorum consuetudinem tanti faciebat S. Gregorius (Lib. x Regist., cap. 22), ut Constantinum monachum a fratribus in abbatem expetitum ideo repulerit, quod peculiaritati studeret, et quia « ad monasterium quod in Piceni provincia situm est, solus pergere sine aliquo fratrum suorum praesumpsit. Ex qua ejus actione cognoscimus, inquit, quia si sine teste ambulat, recte non vivat. » Constitutiones Coelestinorum praescribunt (Tract. 1, cap. 12) ut monachi sine licentia euntes aut soli, carceribus tradantur. » Hujus instituti causas habes apud Haeftenum, lib. xi, tract. 4, disq. 1. Omnium fratrum vel abbatis orationi se commendent.] Idem habes in Regula S. Isidori, cap. 22, et Magistri, cap. 66. Ritum explicat Hildemarus his verbis: « Et hoc notandum est, si longa via vadunt, veluti est ad regem aut etiam in aliquid longe: tunc in capitulum veniet sive abbas sive caeteri quilibet ambulaverint, et ibi coram fratribus manifestatur locus quo pergant, et in illo capitulo prius prosternuntur fratribus, et commendant se orationibus, et osculantur omnes. Et tunc in oratorio prosternuntur, et sic vadunt. Si autem non valde longe vadunt, solummodo in oratorio petant benedictionem, » et fratrum orationes, « dicentes: Orate pro me, fratres, » inquit Richardus de S. Angelo. Id autem tam ex Smaragdo quam ex Hildemaro, et libro Usuum Cisterciensium, c. 88, praestare debebant prostrati ante altare, si tempus ferret; alias tantum incurvati: quamvis in Franciae monasteriis omni tempore genuflecterent, cum hoc discrimine quod diebus quibus ex ecclesiae praescripto genua flectenda essent, etiam prosternerentur, aliis minime, quemadmodum testatur Hildemarus. Prostrati vero ex eodem auctore dicebant: « Domine Jesu Christe, tu scis fragilitatem meam, adjuva me in hoc itinere, quatenus hoc iter obedientiae meae valeam orationibus fratrum sine offensione peragere. » Preces dicendas super eos habes apud Smaragdum et Haeftenum, passimque occurrunt in antiquis libris.","prev":{"citation":"Regula 67.876.1-49","label":"67.876.1 to 67.876.49","url":"https://interlinea.aeterna-institute.org/library/latin/benedict/regula/67.876.1","api":"https://interlinea.aeterna-institute.org/api/v1/library/latin/benedict/regula/67.876.1"},"next":{"citation":"Regula 67.876.75-95","label":"67.876.75 to 67.876.95","url":"https://interlinea.aeterna-institute.org/library/latin/benedict/regula/67.876.75","api":"https://interlinea.aeterna-institute.org/api/v1/library/latin/benedict/regula/67.876.75"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}