{"kind":"section","lang":"la","language":"Latin","title":"Regula 7.200.40-58","citation":"Benedict, Regula 7.200.40-58","ref":"7.200.40","level":null,"urn":null,"url":"https://interlinea.aeterna-institute.org/library/latin/benedict/regula/7.200.40","api":"https://interlinea.aeterna-institute.org/api/v1/library/latin/benedict/regula/7.200.40","markdown":"https://interlinea.aeterna-institute.org/library/latin/benedict/regula/7.200.40.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":276,"text":"Superbia oris vel linguae, quae et jactantia dicitur, est quando homo non solum magna de se sentit, sed etiam loquitur; unde et Psalmista: Disperdat Dominus universa labia dolosa, et linguam magniloquam. Superbia operis est, quando homo exteriori quadam superbia, ut magnus appareat, agit, de qua idem Psalmista ait: Non habitabit in medio domus meae, qui facit superbiam. Superbia habitus est, quando homo ut gloriosus videatur, pretiosis se ornat vestibus; unde Paulus: Non in veste pretiosa; et Dominus: Qui in mollibus vestiuntur in domibus regum sunt, ubi superbia abundat. » Superbia autem quae Cassiano est « saevissima bestia, et superioribus cunctis (vitiis de quibus locutus fuerat) immanior, pertectos maxime tentans, et propemodum jam positos in consummatione virtutum morsu diriore depascens, » a verbo supereo dicitur, ut superbire idem sit ac super se, super alios, super mensuram debitam ire; unde S. Isidorus (De Sum. Bono., cap. 38): « Superbus, inquit, dictus est, qui super vult videri quam est: qui enim vult supergredi quod est, superbus est. » Quod se cavere Propheta indicat, dicens, etc.] Ut nos humilitatis sequi vestigia, superbiamque fugere persuaderet, ad Christi comminationem Prophetae subjungit exemplum, de se dicentis: Domine, non est exaltatum cor meum, etc. Quibus verbis, ut observat Bernardus Cassinensis, duplicem declarat habere se humilitatem: interiorem cum dicit: Non est exaltatum cor meum; exteriorem cum addit: Neque elati sunt oculi mei, etc. Quod ex Smaragdo est dicere: « Nihil meis meritis reputavi, nihil scientiae meae contuli; sed si aliquid boni habui, totum gloriae Dei dedi; nolui quasi mirabilis innotescere hominibus, nec quaesivi aliquid super vires meas, unde me apud imperitos jactarem. Aliter: In magnis enim ambulare est magna de se unumquemque sentire. In mirabilibus est, mirabile de se aliquid existimare.","prev":{"citation":"Regula 7.200.21-39","label":"7.200.21 to 7.200.39","url":"https://interlinea.aeterna-institute.org/library/latin/benedict/regula/7.200.21","api":"https://interlinea.aeterna-institute.org/api/v1/library/latin/benedict/regula/7.200.21"},"next":{"citation":"Regula 7.200.59-81","label":"7.200.59 to 7.200.81","url":"https://interlinea.aeterna-institute.org/library/latin/benedict/regula/7.200.59","api":"https://interlinea.aeterna-institute.org/api/v1/library/latin/benedict/regula/7.200.59"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}