{"kind":"section","lang":"la","language":"Latin","title":"Regula 7.200.59-81","citation":"Benedict, Regula 7.200.59-81","ref":"7.200.59","level":null,"urn":null,"url":"https://interlinea.aeterna-institute.org/library/latin/benedict/regula/7.200.59","api":"https://interlinea.aeterna-institute.org/api/v1/library/latin/benedict/regula/7.200.59","markdown":"https://interlinea.aeterna-institute.org/library/latin/benedict/regula/7.200.59.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":294,"text":"» Sed quid? si non humiliter sentiebam, etc.] Quod Ait: Sicut ablactatus, etc., duobus modis intelligit Hildemarus: 1. Sicut puer ablactatus cum solidum cibum comedere non potest, mortis subit periculum, ita et ego pro tuae beatitudinis dulcedine mortis amarae discrimen incurram, si non humiliter sensero: quam expositionem sequitur Bernardus. Cassin. 2. Sicut mater infantem ablactatura, mamillis amaritudinis aliquid imponit, ut, ea degustata, lactare refugiat, ita mihi pro felicitatis dulcedine amaritudinem tribuas. Unde, fratres.] Fratres vocat non solum monachos, inquit Boherius sed omnes etiam fideles, quos ad coelestem patriam venire peropiat. Si summae humilitatis volumus culmen attingere.] Summae dicit humilitatis, magnum aliquid humilitatis virtutem esse demonstrans. Et revera humilitas pro Christo suscepta regiam praefert dignitatem, ut loquitur Gilbertus de Hoillandia (Serm. 18, in Cant.), cujus etiam magnitudo ex ipso Christi exemplo, et in hanc virtutem amore colligi potest, ut merito S. Bernardus dixerit (Serm. 43, in Cant.): « Magna humilitatis virtus, cui etiam Deitatis majestas tam facile se inclinat. » Et iterum (Epist. 42): « Nescio quo pacto familiarius semper humilitati propinquare solet Divinitas. Denique illa se induit, ut appareret hominibus; substantiam, formam, habitumque gestavit humilem, ipsius nobis commendans virtutis excellentiam, quam speciali sui voluit honorare praesentia. » Culmen autem humilitatis Bernardo Cass. est charitas perfecta, quae foras mittit timorem, de qua ad gradum 12; Boherio vel charitas, vel coelestis patria, vel ipse Deus, qui est exemplum et doctrina totius humilitatis. Et ad exaltationem illam coelestem.] Haec verba priorum possunt esse exposititia, exaltatio enim coelestis et summae humilitatis culmen idem sonant, nempe coelestem patriam, ut mox explicabat Boherius. Ad quam per praesentis vitae humilitatem pervenitur, etc.] Haec est enim ad eam via, quae sicuti sola, ita et securissima; unde Joannes Climacus dicebat (Grad. 25): « Si superbia ex angelis daemones quosdam effecit, haud dubie etiam humilitas ex daemonibus facere potest angelos.","prev":{"citation":"Regula 7.200.40-58","label":"7.200.40 to 7.200.58","url":"https://interlinea.aeterna-institute.org/library/latin/benedict/regula/7.200.40","api":"https://interlinea.aeterna-institute.org/api/v1/library/latin/benedict/regula/7.200.40"},"next":{"citation":"Regula 7.200.82-105","label":"7.200.82 to 7.200.105","url":"https://interlinea.aeterna-institute.org/library/latin/benedict/regula/7.200.82","api":"https://interlinea.aeterna-institute.org/api/v1/library/latin/benedict/regula/7.200.82"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}