{"kind":"section","lang":"la","language":"Latin","title":"Regula 7.200.82-105","citation":"Benedict, Regula 7.200.82-105","ref":"7.200.82","level":null,"urn":null,"url":"https://interlinea.aeterna-institute.org/library/latin/benedict/regula/7.200.82","api":"https://interlinea.aeterna-institute.org/api/v1/library/latin/benedict/regula/7.200.82","markdown":"https://interlinea.aeterna-institute.org/library/latin/benedict/regula/7.200.82.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":281,"text":"Actibus nostris ascendentibus scala illa erigenda est, etc.] Hac in scala ascendentes aut descendentes angeli dicuntur, nulli subsistentes aut residentes; « quatenus, inquit S. Bernardus ad Garinum scribens (Epist. 254), palam daretur intelligi, inter perfectum et defectum in hoc statu mortalis vitae nihil medium inveniri; sed quomodo ipsum corpus nostrum continue aut crescere constat aut decrescere, sic necesse sit et spiritum aut proficere semper aut deficere. » Non aliud sine dubio descensus ille et ascensus a nobis intelligitur, nisi exaltatione descendere, et humilitate ascendere.] Quibus quadrat illud S. Cypriani (De Zelo et Livore): « Humilitate ad summa crescimus; » et S. Hieronymi ad Desiderium scribentis (Epist. 154): » Scis dogma nostrum humilitatis tenere vexillum, et per ima gradientes ad summa scandere; » denique S. Augustini seu cujusvis alterius (Serm. 297 in append. Serm.): « Humilitatis passibus ad coeli culmina conscenditur; quia Deus excelsus non superbia, sed humilitate attingitur, de quo scriptum est: Deus superbis resistit, humilibus autem dat gratiam; unde et in Psalmis dicitur: Excelsus Dominus, et humilia respicit, et alta a longe cognoscit. Alta posuit pro superbis; humilia vero respicit, ut attollat; alta, id est superba, cognoscit ut dejiciat. Latera vero ejusdem scalae dicimus nostrum esse corpus et animam.] Quem in locum Smaragdus: « Sapienter, inquit, nostrum corpus et animam hujus scalae duo dicit esse latera; quia ex utroque omnis homo compositus constat, et pro amore Christi et vita aeterna, ex utraque substantia quae praevalet, agit bona; et ut in resurrectionis gloria in utraque substantia laboris sui recipiat praemia, in utraque substantia sollicite satagit Domini custodire mandata. » Ut autem haec duo coaptentur latera, dolari debent; dolatur autem anima, ut post Bernardum Cassinensem ait Boherius, cum corpori suo compatiens de sua voluntate subtrahit, quod ejus impenditur necessitati ac sustentationi;","prev":{"citation":"Regula 7.200.59-81","label":"7.200.59 to 7.200.81","url":"https://interlinea.aeterna-institute.org/library/latin/benedict/regula/7.200.59","api":"https://interlinea.aeterna-institute.org/api/v1/library/latin/benedict/regula/7.200.59"},"next":{"citation":"Regula 7.200.106-135","label":"7.200.106 to 7.200.135","url":"https://interlinea.aeterna-institute.org/library/latin/benedict/regula/7.200.106","api":"https://interlinea.aeterna-institute.org/api/v1/library/latin/benedict/regula/7.200.106"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}