{"kind":"section","lang":"la","language":"Latin","title":"Regula 7.212.1-26","citation":"Benedict, Regula 7.212.1-26","ref":"7.212.1","level":null,"urn":null,"url":"https://interlinea.aeterna-institute.org/library/latin/benedict/regula/7.212.1","api":"https://interlinea.aeterna-institute.org/api/v1/library/latin/benedict/regula/7.212.1","markdown":"https://interlinea.aeterna-institute.org/library/latin/benedict/regula/7.212.1.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":286,"text":"Porro hunc gradum humilitatis non scandunt, qui aut importunitate, aut pusillanimitate licentiam a superiore extorquent ea faciendi etiam bona quae desiderant; nam extorta seu coacta licentia, licentia non est, sed violentia, inquit S. Bernardus (Epist. 87), frustraque sibi de abbatis permissione blandiuntur, qui non tam vocem quam voluntatem attendere debuerant. Vide Petri Vener. epistolam ad Gislebertum eremitam, lib. i, epist. 20. De tertio humilitatis gradu. Tertius humilitatis gradus est, ut quis pro Dei amore, omni obedientia se subdat majori.] Recte enim sequitur, ut qui propriam non amans voluntatem desideria sua haud delectatur implere, omni obedientia se subdat majori: quod duobus modis ex Hildemaro intelligi potest. 1° Referen…o vocem universalem omni ad obedientia, ut sensus sit, quaecunque jusserit abbas, sive contineantur in Regula, sive non, ea impigre monachus exsequatur. Atque ita hunc S. Benedicti locum intellexit S. Bernardus (De Praec. et Disp., cap. 6): « In eadem Regula, inquit, tertius gradus humilitatis praescribitur, ut omni obedientia monachus se subdat majori. Dicens quippe omni, non vult nos in obediendo mensura esse contentos professionis, non attendere promissi debitum, non de pacto sumere modum; sed transire alacriter etiam votum, et obedire in omnibus. » Similiter Petrus Boherius in secundo comm.: « Omni obedientia, id est nihil suae discretioni, sed judicio ejus universa committat, ac monita ejus sitiens libenter auscultet. » Eodem modo etiam Menardus. 2° Referendo terminum omni ad majori, quasi diceret, Omni majori se subdat et obediat. Majoris autem nomine non solum abbas, qui Major monasterii in conc. Carth. iv, can. 13, appellatur, intelligendus esset, sed etiam quicunque alius supra se positus, ut praepositus, decanus, alicujus obedientiae seu ministerii praefectus, verbigratia, sacrista, cellerarius, aut alicujus artis magister, vel etia n antiquior ordine professionis; imo etiam inferior, quem sibi ex humilitate superiorem arbitratur.","prev":{"citation":"Regula 7.207.148-150","label":"7.207.148 to 7.207.150","url":"https://interlinea.aeterna-institute.org/library/latin/benedict/regula/7.207.148","api":"https://interlinea.aeterna-institute.org/api/v1/library/latin/benedict/regula/7.207.148"},"next":{"citation":"Regula 7.212.27-46","label":"7.212.27 to 7.212.46","url":"https://interlinea.aeterna-institute.org/library/latin/benedict/regula/7.212.27","api":"https://interlinea.aeterna-institute.org/api/v1/library/latin/benedict/regula/7.212.27"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}