{"kind":"section","lang":"la","language":"Latin","title":"Regula 70.886.72-91","citation":"Benedict, Regula 70.886.72-91","ref":"70.886.72","level":null,"urn":null,"url":"https://interlinea.aeterna-institute.org/library/latin/benedict/regula/70.886.72","api":"https://interlinea.aeterna-institute.org/api/v1/library/latin/benedict/regula/70.886.72","markdown":"https://interlinea.aeterna-institute.org/library/latin/benedict/regula/70.886.72.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":239,"text":"Vel, ut loquitur S. Ferreolus, ad quos pertinet correctionis vel nosse modum, vel tenere judicium. Nec puto unquam fuisse permissum iis qui 17 aut 16, imo et 20 aetatis annum vix attigerunt, passim pueros caedere. » Nam in fortiori aetate qui praesumpserit, etc.] Ita S. Aurelianus decernit (Cap. 13), ut « frater in fratrem si ausus fuerit manum mittere, legitimam disciplinam accipiat. » Quae verba tanquam ex concilio Ilerdensi, cap. 7, citantur ab Ivone Carnotensi, p. 6 decreti, cap 292. Sed ea desumpsisse videtur S. Aurelianus ex Regula S. Caesarii ad virgines, ubi haec leguntur (Cap. 24): « Si forte, ut se habet humana fragilitas, in tantum nefas aliquae de sororibus ausae fuerint, diabolo instigante, prorumpere, aut ut furtum faciant, aut in se invicem manum mittant, justum est ut legitimam disciplinam accipiant. » In Regula vero S. Ferreoli praescribitur (Cap. 21), ut « quisquis taliter incontinens manibus invenitur, ita ut nesciat ab illicitis temperare, manus illae quas erexit in proximum, per longum tempus non solum jejunio, sed etiam operis assiduitate lassentur, ut deinceps ad Deum leventur in oratione, non cum furore extendantur in fratrem. » Caeterum quod hic statuit S. Benedictus de pueris usque ad annos 15 caedendis, confirmatur ex praxi veterum monachorum, quam videre est apud Severum Sulpicium, lib. i Dialog., cap. 5, ubi refert duos pueros, quorum unus 12, alter 15 erat annorum, ab abbate suo flagris exceptos fuisse, eo quod patratum a se miraculum aliis fratribus divulgaverant, ne scilicet vana elati gloria perirent.","prev":{"citation":"Regula 70.886.50-71","label":"70.886.50 to 70.886.71","url":"https://interlinea.aeterna-institute.org/library/latin/benedict/regula/70.886.50","api":"https://interlinea.aeterna-institute.org/api/v1/library/latin/benedict/regula/70.886.50"},"next":{"citation":"Regula 71.891.1-26","label":"71.891.1 to 71.891.26","url":"https://interlinea.aeterna-institute.org/library/latin/benedict/regula/71.891.1","api":"https://interlinea.aeterna-institute.org/api/v1/library/latin/benedict/regula/71.891.1"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}