{"kind":"section","lang":"la","language":"Latin","title":"Regula 71.891.47-62","citation":"Benedict, Regula 71.891.47-62","ref":"71.891.47","level":null,"urn":null,"url":"https://interlinea.aeterna-institute.org/library/latin/benedict/regula/71.891.47","api":"https://interlinea.aeterna-institute.org/api/v1/library/latin/benedict/regula/71.891.47","markdown":"https://interlinea.aeterna-institute.org/library/latin/benedict/regula/71.891.47.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":283,"text":"2° Qui opere non potest, corde saltem et voluntate, quam praesertim respicit Deus, obedire nihil vetat. 3° In eadem etiam addicti obedientia sibi invicem obtemperare possunt, verbi gratia, cum pannos lavaturi fratres mittuntur, delicati alicujus fratris hoc ab eo deprecantis pannos ipse lavare potest; coquinae officio deputatus, socio in hac arte minus versato aliquid circa coquinae ministerium petenti obedire potest. Primam et tertiam responsionem proferunt etiam Bernardus Cassinensis et Boherius. Quod si quis contentiosus reperitur, corripiatur.] Quem in locum Hildemarus: « Et bene, inquit, cum obedientiae fecit mentionem, subjunxit: Si quis contentiosus fuerit, corripiatur, quia nulli magis contentio congruit, quam inobedienti. » Contentiosus autem eidem Hildemaro « est ille, qui quidquid agit, semper eum murmurio vel detractione agit, sive cum defensione mala, atque ingenio. » Secundum Bernardum Cassinensem vero « contentiosus ad inobedientiam attinet; sed hic plus importat, videlicet quod non solum obedire contemnit, sed etiam cum imperante superbe contendit. » At Boherio contentiosus est ille. « qui alium incitat sermonibus duris et contumeliosis, et qui respondet mala malum dicenti, vel male bonum operanti. » Si quis autem frater pro quavis minima causa, ab abbate, vel a quocunque priore suo corripiatur.] Hunc locum Boherius in 2 commentario intelligit de correptione quae fit « in capitulo regulari, in quo etiam de more coram cunctis debet proclamari ad culpam, et corripi ad emendam. » At rectius in 1 commentario dixerat: « Credo hic loqui de correptione privata, quam priores omnes possunt exercere in junioribus, non de correptione publica, quae fit verbis, quandoque verberibus in capitulo; nam illam solus abbas, vel cui commiserit ipse exercere debet. » Et certe S. Pater hic non loquitur de correptione quae fit ab abbate, aut solo priore, sed de ea quae fit a quocunque priore suo. Quolibet modo.] Sive juste, sive injuste.","prev":{"citation":"Regula 71.891.27-46","label":"71.891.27 to 71.891.46","url":"https://interlinea.aeterna-institute.org/library/latin/benedict/regula/71.891.27","api":"https://interlinea.aeterna-institute.org/api/v1/library/latin/benedict/regula/71.891.27"},"next":{"citation":"Regula 71.891.63-90","label":"71.891.63 to 71.891.90","url":"https://interlinea.aeterna-institute.org/library/latin/benedict/regula/71.891.63","api":"https://interlinea.aeterna-institute.org/api/v1/library/latin/benedict/regula/71.891.63"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}