{"kind":"section","lang":"la","language":"Latin","title":"Regula 73.7","citation":"Benedict, Regula 73.7","ref":"73.7","level":null,"urn":null,"url":"https://interlinea.aeterna-institute.org/library/latin/benedict/regula/73.7","api":"https://interlinea.aeterna-institute.org/api/v1/library/latin/benedict/regula/73.7","markdown":"https://interlinea.aeterna-institute.org/library/latin/benedict/regula/73.7.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":133,"text":"Necnon et Collationes Patrum, et Instituta, et Vitas eorum.] Patrum Collationes hic commentatores intelligunt eas quas numero viginti quatuor descripsit Cassianus. Similiter Instituta libros duodecim quos de Institutis renuntiantium composuit. Per Vitas autem Patrum interpretantur aut eos libros qui dicta et facta priscorum monachorum continent, quos vulgo Vitas Patrum appellant, aut etiam acta quorumcunque sanctorum scripta, quorum exempla ad perfectiorem vitam segniores haud parum excitant, uti nos docet S. Joannes Climacus his verbis (Grad. 26): « Religiosorum Patrum vitae et virtutes auditae, seu recitatae, et lectae, mentem nostram ad imitandi studium excitant; doctrinae vero auditio est lucerna quae pellit tenebras, quaeque errantes in viam reducit, caecutientes illustrat. » Certe Gregorius episcopus Turonensis (Lib. de Vit. Pat. cap, ult.) Vitas Patrum, et Institutiones monachorum Leobardo monacho, ad Majus monasterium recluso direxit, ut eum adversus tentationes praemuniret.","prev":{"citation":"Regula 73.6","label":"Chapter 73","url":"https://interlinea.aeterna-institute.org/library/latin/benedict/regula/73.6","api":"https://interlinea.aeterna-institute.org/api/v1/library/latin/benedict/regula/73.6"},"next":{"citation":"Regula 73.8","label":"Chapter 73","url":"https://interlinea.aeterna-institute.org/library/latin/benedict/regula/73.8","api":"https://interlinea.aeterna-institute.org/api/v1/library/latin/benedict/regula/73.8"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}