{"kind":"section","lang":"la","language":"Latin","title":"Regula 9.269.68-86","citation":"Benedict, Regula 9.269.68-86","ref":"9.269.68","level":null,"urn":null,"url":"https://interlinea.aeterna-institute.org/library/latin/benedict/regula/9.269.68","api":"https://interlinea.aeterna-institute.org/api/v1/library/latin/benedict/regula/9.269.68","markdown":"https://interlinea.aeterna-institute.org/library/latin/benedict/regula/9.269.68.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":286,"text":"Idem S. doctor (Lib. iv, ep. 45) Andreae Scholastico ita scribit: « Sed nec Joannem presbyterum psalmorum nesciam praesumpsimus ordinare; haec enim res minus sui profectus habere studium demonstrabat. » Unde mirari subit quod scribit Walfridus Strabas (Lib. de Reb. eccl., cap. 25), psalmodiae memoriter exercendae ante sua tempora usum rariorem fuisse, « ut de novissimis pene Romanorum praesulibus, inquit, et qui nec ducentis annis nostra tempora praecesserunt, quasi memorabile quiddam et singulare scribatur, si qui eorum praedictis in rebus eminentiores caeteris viderentur.... De Gregorio autem tertio velut inauditum quiddam, et novum refertur, quod omnes psalmos memoriter tenuerit. » Ut autem ad propositum revertamur, cum omnes veteres monachi Psalterium ex corde discerent, ut hactenus demonstratum est, et alioquin rariores illo tempore forent codices manu exarati (nam, verbi gratia, in Centulensi monasterio, in quo trecenti minimum erant monachi cum centum pueris, non nisi septem psalteria habebantur, ut constat ex librorum ejusdem monasterii catalogo anno 831 facto), manifestum est psalmos a nostris ex corde decantatos fuisse: unde etiam antiquae Germaniae Consuetudines mss. praescribunt (Num. 13), ut lectori provideatur ab oratorii provisore candela, abbati ab armario, eo quod prius psalmos in tenebris sinc lumine, ac proinde sinc libro cantarent. Lectiones autem a fratribus vicissim recitari voluit S. Benedictus, « id est per vices, alternatim, vel mutuo, id est tunc iste, tunc ille; nunc hinc, nunc inde, » inquit Smaragdus; sive, ut ait Bernardus Cassinensis, « alternative sibi succedendo, » ita ut nunquam duas unus et idem legat lectiones, unde et ad singulas petitur benedictio, quam iterare necesse non esset, si unus et idem plures consequenter legere deberet lectiones. Et certe id postulabat summa S. Patris discretio, ne forte nimium laborarent in legendo, maxime cum prolixiores tunc temporis essent lectiones, nec ita facile esset legere in codicibus manuscriptis.","prev":{"citation":"Regula 9.269.27-67","label":"9.269.27 to 9.269.67","url":"https://interlinea.aeterna-institute.org/library/latin/benedict/regula/9.269.27","api":"https://interlinea.aeterna-institute.org/api/v1/library/latin/benedict/regula/9.269.27"},"next":{"citation":"Regula 9.269.87-121","label":"9.269.87 to 9.269.121","url":"https://interlinea.aeterna-institute.org/library/latin/benedict/regula/9.269.87","api":"https://interlinea.aeterna-institute.org/api/v1/library/latin/benedict/regula/9.269.87"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}