{"kind":"section","lang":"la","language":"Latin","title":"Regula prologus.28.181-201","citation":"Benedict, Regula prologus.28.181-201","ref":"prologus.28.181","level":null,"urn":null,"url":"https://interlinea.aeterna-institute.org/library/latin/benedict/regula/prologus.28.181","api":"https://interlinea.aeterna-institute.org/api/v1/library/latin/benedict/regula/prologus.28.181","markdown":"https://interlinea.aeterna-institute.org/library/latin/benedict/regula/prologus.28.181.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":285,"text":"Hinc S. Bernardus (Serm. 33 in Cant.): « Primordia, inquit, nostrae conversionis, juxta communis quidem experientiae rationem, primus exagitat timor, quem intrantibus statim horror vitae ingerit arctioris, et insuetae austeritas disciplinae; » et alibi (Serm. 93 de Divers.): « Cum aliqui simplices ad conversionem veniunt, severitatem Regulae expavescunt. Si fiat eis sermo de mundi contemptu, de virutum vitiorumque conflictu, si anxietas vigilandi, assiduitas orandi, parcimonia jejunandi ab ipsis requiritur, dicunt conquerendo inter se: Quid est hoc? quis tot et tanta implere sufficiat? » Hinc denique Petrus Blesensis ad R. Clericum, qui religionis voverat ingressum, scribens: « Quia te, inquit, mundi voluptatibus hactenus immersisti, importabilia tibi videntur ciborum mutatio, vestimentorum asperitas, jugum obedientiae, censura silentii, regularitas morum, austeritas disciplinae. » Ex parte diaboli longe fortior sustinenda est pugna: « Quemadmodum enim latrones, verba loquor Chrysostomi (Homil. 1 ad pop. Ant.), non ubi fenum, et paleae, et calamus; sed ubi aurum, et argentum, ibi fodiunt, et continuo vigilant; sic et diabolus his maxime instat, qui spiritalia attingunt negotia; ibi insidiae ubi virtus. » At licet omnes omnino monachos impugnet diabolica versutia, multo tamen magis furit in noviter conversos, quos adolescentes delicatosque a se defecisse dolet: « Nequam hostes, inquit Petrus Venerabilis agens de novitiis Cluniacensis monasterii (Lib. i Mir., cap. 15), quamvis universis generaliter insidiarentur, noviter tamen conversis amplius infesti instabant. Dolebant quidem veteranorum profectibus invidentes, sed tironum superaddita conversione, quasi recenti suscepto vulnere, acrius indignabantur, et, velut longi temporis desperatione, prioris praedae spolia postponentes, contra ea quae ab oculis rapiebantur longe vehementius accendebantur; hinc adversus novitios bella valida commovebant, hinc tentamentorum diversis telis armati, lotis eis conatibus insistebant. » Sic nimirum egredientem ex Aegypto Dei populum Pharao, vera daemonis figura, vehementius excandescens persequebatur, et Satanas ipse exiens ab homine quem ab infantia tenuerat, gravius affligendo discerpebat.","prev":{"citation":"Regula prologus.28.165-180","label":"prologus.28.165 to prologus.28.180","url":"https://interlinea.aeterna-institute.org/library/latin/benedict/regula/prologus.28.165","api":"https://interlinea.aeterna-institute.org/api/v1/library/latin/benedict/regula/prologus.28.165"},"next":{"citation":"Regula prologus.28.202-223","label":"prologus.28.202 to prologus.28.223","url":"https://interlinea.aeterna-institute.org/library/latin/benedict/regula/prologus.28.202","api":"https://interlinea.aeterna-institute.org/api/v1/library/latin/benedict/regula/prologus.28.202"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}