{"kind":"section","lang":"la","language":"Latin","title":"Regula prologus.28.248-270","citation":"Benedict, Regula prologus.28.248-270","ref":"prologus.28.248","level":null,"urn":null,"url":"https://interlinea.aeterna-institute.org/library/latin/benedict/regula/prologus.28.248","api":"https://interlinea.aeterna-institute.org/api/v1/library/latin/benedict/regula/prologus.28.248","markdown":"https://interlinea.aeterna-institute.org/library/latin/benedict/regula/prologus.28.248.md","author":{"name":"Benedict","url":"https://interlinea.aeterna-institute.org/library/latin/benedict"},"work":{"title":"Regula","url":"https://interlinea.aeterna-institute.org/library/latin/benedict/regula","urn":null},"verse":false,"words":291,"text":"» Ad hujusmodi crudelitatem nos etiam hortatur propheta cum dicit: Obliviscere populum tuum et domum patris tui, et concupiscet Rex decorem tuum; ad quod attendens S. Hieronymus exclamat (Epist. 10, ad Furiam): « Grande praemium parentis obliti: Et concupiscet Rex decorem tuum. » Processu vero conversationis, et fidei, dilatato corde, inenarrabili dilectionis dulcedine curritur via mandatorum Dei,] juxta illud Spiritus sancti in Proverbiis (Cap. iv): Ducam te per semitas aequitatis, quas cum ingressus fueris, non arctabuntur gressus tui, et curreus non habebis offendiculum; et Ecclesiastici vi: In …pere ipsius (sapientiae) exiguum laborabis, et cito edes de generationibus illius; et apud Apostolum: Omnis autem disciplina in praesenti quidem videtur non este gaudii, sed moeroris; postea autem fructum pacatissimum exercitatis per eam reddet justitias (Heb. xii). Sed lubet hic sancti Benedicti textum excutere: Processu, inquit, conversationis et fidei. Hac verba duplicem sensum sortiri possunt: nam primo processu conversationis ita potest intelligi, ac si diceretur, successu temporis, usu ac exercitio, bonaque regularis observantiae consuetud ne facilia reperies quae difficilia, latissima quae prius videbatur angusta. « Nuditatem pedum, inquit Petrus Damiani (Opusc. 15, cap. 21), et exiguitatem vestium, lecti duritiam, ciborum asperitatem, aquae potum, et caetera hujusmodi incipientes quidem non sine quadam formidine perhorrescimus; perseverantes autem, et longanimiter insistentes, faciliora et tolerabiliora deputamus: asperitatem quippe frequentia mitigat, rigorem consuetudo commendat. » Et Petrus Blesensis ad Alexandrum novitium scribens (Epist. 137): « Non te deterreant conversationis primitiae, novum obedientiae jugum, inconsuetus ordinis rigor, et austeritas disciplinae: quidquid asperum nunc videtur, obedientia sibi convertet ad lucrum; quae nunc amariora sunt, usu mediante dulcescent; his enim qui de tenebris progrediuntur ad lumen lux imprimis molesta est, donec oculi lumini assuescant. » Eadem ratione Robertum nepotem excitabat S. Bernardus (Epist. 1): « Subito procedenti de umbra ad solem, de otio ad laborem, grave cernitur omne quod incipit;","prev":{"citation":"Regula prologus.28.224-247","label":"prologus.28.224 to prologus.28.247","url":"https://interlinea.aeterna-institute.org/library/latin/benedict/regula/prologus.28.224","api":"https://interlinea.aeterna-institute.org/api/v1/library/latin/benedict/regula/prologus.28.224"},"next":{"citation":"Regula prologus.28.271-286","label":"prologus.28.271 to prologus.28.286","url":"https://interlinea.aeterna-institute.org/library/latin/benedict/regula/prologus.28.271","api":"https://interlinea.aeterna-institute.org/api/v1/library/latin/benedict/regula/prologus.28.271"},"credit":{"text":"Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml","quality":"ocr"}}