{"kind":"section","lang":"la","language":"Latin","title":"Carmina 4","citation":"Catullus, Carmina 4","ref":"4","level":null,"urn":"urn:cts:latinLit:phi0472.phi001.perseus-lat2:4","url":"https://interlinea.aeterna-institute.org/library/latin/catullus/carmina/4","api":"https://interlinea.aeterna-institute.org/api/v1/library/latin/catullus/carmina/4","markdown":"https://interlinea.aeterna-institute.org/library/latin/catullus/carmina/4.md","author":{"name":"Catullus","url":"https://interlinea.aeterna-institute.org/library/latin/catullus"},"work":{"title":"Carmina","url":"https://interlinea.aeterna-institute.org/library/latin/catullus/carmina","urn":"urn:cts:latinLit:phi0472.phi001"},"verse":true,"words":138,"text":"Phasellus ille, quem videtis, hospites,\nait fuisse navium celerrimus,\nneque ullius natantis impetum trabis\nnequisse praeterire, sive palmulis\nopus foret volare sive linteo.\net hoc negat minacis Hadriatici\nnegare litus insulasve Cycladas\nRhodumque nobilem horridamque Thraciam\nPropontida trucemve Ponticum sinum,\nubi iste post phasellus antea fuit\ncomata silva: nam Cytorio in iugo\nloquente saepe sibilum edidit coma.\nAmastri Pontica et Cytore buxifer,\ntibi haec fuisse et esse cognitissima\nait phasellus; ultima ex origine\ntuo stetisse dicit in cacumine,\ntuo imbuisse palmulas in aequore,\net inde tot per impotentia freta\nerum tulisse, laeva sive dextera\nvocaret aura, sive utrumque Iuppiter\nsimul secundus incidisset in pedem;\nneque ulla vota litoralibus diis\nsibi esse facta, cum veniret a mari\nnovissimo hunc ad usque limpidum lacum.\nsed haec prius fuere: nunc recondita\nsenet quiete seque dedicat tibi,\ngemelle Castor et gemelle Castoris.","prev":{"citation":"Carmina 3","label":"Poem 3","url":"https://interlinea.aeterna-institute.org/library/latin/catullus/carmina/3","api":"https://interlinea.aeterna-institute.org/api/v1/library/latin/catullus/carmina/3"},"next":{"citation":"Carmina 5","label":"Poem 5","url":"https://interlinea.aeterna-institute.org/library/latin/catullus/carmina/5","api":"https://interlinea.aeterna-institute.org/api/v1/library/latin/catullus/carmina/5"},"credit":{"text":"Catullus, Carmina, ed. Elmer Truesdell Merrill. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0472/phi001/phi0472.phi001.perseus-lat2.xml","quality":"proofread"}}