{"kind":"section","lang":"la","language":"Latin","title":"Carmina 76","citation":"Catullus, Carmina 76","ref":"76","level":null,"urn":"urn:cts:latinLit:phi0472.phi001.perseus-lat2:76","url":"https://interlinea.aeterna-institute.org/library/latin/catullus/carmina/76","api":"https://interlinea.aeterna-institute.org/api/v1/library/latin/catullus/carmina/76","markdown":"https://interlinea.aeterna-institute.org/library/latin/catullus/carmina/76.md","author":{"name":"Catullus","url":"https://interlinea.aeterna-institute.org/library/latin/catullus"},"work":{"title":"Carmina","url":"https://interlinea.aeterna-institute.org/library/latin/catullus/carmina","urn":"urn:cts:latinLit:phi0472.phi001"},"verse":true,"words":188,"text":"Si qua recordanti benefacta priora voluptas\nest homini, cum se cogitat esse pium,\nnec sanctam violasse fidem, nec foedere in ullo\ndivum ad fallendos numine abusum homines,\nmulta parata manent in longa aetate, Catulle,\nex hoc ingrato gaudia amore tibi.\nnam quaecumque homines bene cuiquam aut dicere possunt\naut facere, haec a te dictaque factaque sunt:\nomnia quae ingratae perierunt credita menti.\nquare cur tu te iam amplius excrucies?\nquin tu animo offirmas atque istinc teque reducis\net dis invitis desinis esse miser?\ndifficile est longum subito deponere amorem;\ndifficile est, verum hoc qua libet efficias.\nuna salus haec est, hoc est tibi pervincendum;\nhoc facias, sive id non pote sive pote.\no di, si vestrum est misereri, aut si quibus unquam\nextremam iam ipsa in morte tulistis opem,\nme miserum adspicite et, si vitam puriter egi,\neripite hanc pestem perniciemque mihi!\nhei mihi subrepens imos ut torpor in artus\nexpulit ex omni pectore laetitias.\nnon iam illud quaero, contra ut me diligat illa,\naut, quod non potis est, esse pudica velit:\nipse valere opto et taetrum hunc deponere morbum.\no di, reddite mi hoc pro pietate mea.","prev":{"citation":"Carmina 75","label":"Poem 75","url":"https://interlinea.aeterna-institute.org/library/latin/catullus/carmina/75","api":"https://interlinea.aeterna-institute.org/api/v1/library/latin/catullus/carmina/75"},"next":{"citation":"Carmina 77","label":"Poem 77","url":"https://interlinea.aeterna-institute.org/library/latin/catullus/carmina/77","api":"https://interlinea.aeterna-institute.org/api/v1/library/latin/catullus/carmina/77"},"credit":{"text":"Catullus, Carmina, ed. Elmer Truesdell Merrill. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0472/phi001/phi0472.phi001.perseus-lat2.xml","quality":"proofread"}}