{"kind":"section","lang":"la","language":"Latin","title":"Carmina 8","citation":"Catullus, Carmina 8","ref":"8","level":null,"urn":"urn:cts:latinLit:phi0472.phi001.perseus-lat2:8","url":"https://interlinea.aeterna-institute.org/library/latin/catullus/carmina/8","api":"https://interlinea.aeterna-institute.org/api/v1/library/latin/catullus/carmina/8","markdown":"https://interlinea.aeterna-institute.org/library/latin/catullus/carmina/8.md","author":{"name":"Catullus","url":"https://interlinea.aeterna-institute.org/library/latin/catullus"},"work":{"title":"Carmina","url":"https://interlinea.aeterna-institute.org/library/latin/catullus/carmina","urn":"urn:cts:latinLit:phi0472.phi001"},"verse":true,"words":110,"text":"Miser Catulle, desinas ineptire,\net quod vides perisse perditum ducas.\nfulsere quondam candidi tibi soles,\ncum ventitabas quo puella ducebat\namata nobis quantum amabitur nulla.\nibi illa multa tum iocosa fiebant,\nquae tu volebas nec puella nolebat.\nfulsere vere candidi tibi soles.\nnunc iam illa non vult: tu quoque, impotens, noli,\nnec quae fugit sectare, nec miser vive,\nsed obstinata mente perfer, obdura.\nvale, puella! iam Catullus obdurat,\nnec te requiret nec rogabit invitam:\nat tu dolebis, cum rogaberis nulla.\nscelesta, vae te! quae tibi manet vita!\nquis nunc te adibit? cui videberis bella?\nquem nunc amabis? cuius esse diceris?\nquem basiabis? cui labella mordebis?\nat tu, Catulle, destinatus obdura.","prev":{"citation":"Carmina 7","label":"Poem 7","url":"https://interlinea.aeterna-institute.org/library/latin/catullus/carmina/7","api":"https://interlinea.aeterna-institute.org/api/v1/library/latin/catullus/carmina/7"},"next":{"citation":"Carmina 9","label":"Poem 9","url":"https://interlinea.aeterna-institute.org/library/latin/catullus/carmina/9","api":"https://interlinea.aeterna-institute.org/api/v1/library/latin/catullus/carmina/9"},"credit":{"text":"Catullus, Carmina, ed. Elmer Truesdell Merrill. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0472/phi001/phi0472.phi001.perseus-lat2.xml","quality":"proofread"}}