{"kind":"section","lang":"la","language":"Latin","title":"Timaeus 18","citation":"Cicero, Timaeus 18","ref":"18","level":null,"urn":"urn:cts:latinLit:phi0474.phi072.perseus-lat1:18","url":"https://interlinea.aeterna-institute.org/library/latin/cicero/timaeus/18","api":"https://interlinea.aeterna-institute.org/api/v1/library/latin/cicero/timaeus/18","markdown":"https://interlinea.aeterna-institute.org/library/latin/cicero/timaeus/18.md","author":{"name":"Cicero","url":"https://interlinea.aeterna-institute.org/library/latin/cicero"},"work":{"title":"Timaeus","url":"https://interlinea.aeterna-institute.org/library/latin/cicero/timaeus","urn":"urn:cts:latinLit:phi0474.phi072"},"verse":false,"words":97,"text":"Omni autem totam figuram mundi levitate circumdedit. Nec enim oculis egebat, quia nihil extra, quod cerni posset, relictum erat, nec auribus, quia ne quod audiretur quidem, neque erant anima circumfusa extrema mundi, ut respirationem requireret, nec vero desiderabat aut alimenta corporis aut detractionem confecti et consumpti cibi; neque enim ulla decessio fieri poterat neque accessio, nec vero erat unde. Itaque se ipse consumptione et senio alebat sui, cum ipse per se et a se et pateretur et faceret omnia. Sic enim ratus est ille, qui ista iunxit et condidit, ipsum se contentum esse mundum neque egere altero.","prev":{"citation":"Timaeus 17","label":"17","url":"https://interlinea.aeterna-institute.org/library/latin/cicero/timaeus/17","api":"https://interlinea.aeterna-institute.org/api/v1/library/latin/cicero/timaeus/17"},"next":{"citation":"Timaeus 19","label":"19","url":"https://interlinea.aeterna-institute.org/library/latin/cicero/timaeus/19","api":"https://interlinea.aeterna-institute.org/api/v1/library/latin/cicero/timaeus/19"},"credit":{"text":"Cicero, Timaeus, ed. Carl Friedrich Wilhelm Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0474/phi072/phi0474.phi072.perseus-lat1.xml","quality":"proofread"}}