{"kind":"section","lang":"la","language":"Latin","title":"Versus ad Sethum 1-44","citation":"Columbanus, Versus ad Sethum 1-44","ref":"1","level":null,"urn":null,"url":"https://interlinea.aeterna-institute.org/library/latin/columbanus/versus-ad-sethum/1","api":"https://interlinea.aeterna-institute.org/api/v1/library/latin/columbanus/versus-ad-sethum/1","markdown":"https://interlinea.aeterna-institute.org/library/latin/columbanus/versus-ad-sethum/1.md","author":{"name":"Columbanus","url":"https://interlinea.aeterna-institute.org/library/latin/columbanus"},"work":{"title":"Versus ad Sethum","url":"https://interlinea.aeterna-institute.org/library/latin/columbanus/versus-ad-sethum","urn":null},"verse":true,"words":277,"text":"Suscipe, Sethe, libens et perlege mente serena\nDicta Columbani fida te uoce monentis;\nQuae licet ornatu careant sermonis honesti,\nVota tamen mentisque piae testantur amorem.\nViue Deo fidens, Christi praecepta sequendo,\nDummodo uita manet, dum tempora certa salutis;\nTempus et hora uolat, momentis labitur aetas.\nDispice, quae pereunt, fugitiuae gaudia uitae.\nNon fragiles secteris opes et inania lucra,\nNec te sollicitet circumflua copia rerum.\nSint tibi diuitiae diuinae dogmata legis,\nSanctorumque patrum castae moderamina uitae,\nOmnia quae dociles scripserunt ante magistri,\nVel quae doctiloqui cecinerunt carmina uates.\nHas cape, diuitias semper contemne caducas,\nIn mentemque tibi ueniat tremebunda senectus,\nQuam gelidae tandem sequitur uiolentia mortis.\nVltima iam sapiens meditatur tempora uitae,\nTorpentes senio uires morbosque frequentes\nIncertumque diem leti certosque dolores;\nMulta senem fragilis uexant incommoda carnis.\nNam matie turpi tabescunt languida membra;\nTunc genuum iunctura riget, uenasque per omnes\nIllius in toto frigescit corpore sanguis;\nSic baculo nitens artus sustentat inertes.\nQuid tristis memorem gemitus, quid tedia mentis?\nSomnus abest oculis, illum sonus excitat omnis.\nQuid tunc argenti, fului quid proderit auri\nImproba congeries multos collecta per annos?\nMunera quid procerum? Ditis quid prandia mensae?\nQuid meminisse iuuat transactae gaudia uitae,\nVenerit extremi tandem cum terminus aeui?\nHaec, dum uita uolat, uigili qui mente retractat,\nSpernit auaritiam uanosque refutat honores.\nQuid modo terrenis mentes intendere curis\nMortales cupiunt? Quid turpia lucra sequuntur?\nSemper auarus eget nummo, testante poeta,\nCrescit amor nummi, quantum ipsa pecunia crescit.\nIndiget inter opes nec habet quod habere uidetur,\nIlle domi solus nummos abscondit in arca\nDiuitias cumulans; dum sese nescit amare,\nPlus amat heredem, seruat cui cuncta fidelis.\nO nimium felix, parcus cui sufficit usus,\nCorporis ut curam moderamine temperet aequo.","prev":null,"next":{"citation":"Versus ad Sethum 45-77","label":"Lines 45-77","url":"https://interlinea.aeterna-institute.org/library/latin/columbanus/versus-ad-sethum/45","api":"https://interlinea.aeterna-institute.org/api/v1/library/latin/columbanus/versus-ad-sethum/45"},"credit":{"text":"Columbanus, Versus ad Sethum. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/COLVMB%7Cseth%7C001","quality":"proofread"}}