{"kind":"section","lang":"la","language":"Latin","title":"Instructiones 1.24","citation":"Commodianus, Instructiones 1.24","ref":"1.24","level":null,"urn":null,"url":"https://interlinea.aeterna-institute.org/library/latin/commodianus/instructiones/1.24","api":"https://interlinea.aeterna-institute.org/api/v1/library/latin/commodianus/instructiones/1.24","markdown":"https://interlinea.aeterna-institute.org/library/latin/commodianus/instructiones/1.24.md","author":{"name":"Commodianus","url":"https://interlinea.aeterna-institute.org/library/latin/commodianus"},"work":{"title":"Instructiones","url":"https://interlinea.aeterna-institute.org/library/latin/commodianus/instructiones","urn":"urn:cts:latinLit:stoa0096.stoa003"},"verse":true,"words":163,"text":"Inter utrumque putans dubie uiuendo carere\nNudatus a lege, decrepitus luxu praecedis.\nTot, uane, <luxurias> prospicis; quid quaeris iniqua?\nEt quidquid egistis, istinc remanere defuncto\nRespicite! Stulte, non eras, et ecce uideris!\nVnde processisti nescis nec unde nutriris.\nTu Deum excelsum fugis tuae uitae benignum\nRectoremque tuum, qui te magis uiuere uelit;\nVertis te in faciem et dorsum Deo remittis,\nMergis te in tenebris, dum putas te in lucem morari.\nQuid in sinagoga decurris saepe bifarius?\nVt tibi misericors fiat, quem denegas ultro?\nExis inde foris, iterum tu fana requiris;\nVis inter utrumque uiuere, sed inde peribis.\nInsuper et dicis: \"Quis est, qui a morte reuenit\nVt credamus ei, quoniam ibi poenas aguntur?\"\nEa non sunt sic, ut tu putas esse, maligne!\nNam illique prodest post funera, recte qui uixit,\nTu tamen mox moreris, duceris in loco maligno;\nIn Christo credentes autem in loco benigno,\nBlanditurque quibus haeret amoenitas illa.\nVos autem dubios uiuos sine corpore poena\nSuscitat in faciem tortoris sero clamare.","prev":{"citation":"Instructiones 1.23","label":"Poem 1.23","url":"https://interlinea.aeterna-institute.org/library/latin/commodianus/instructiones/1.23","api":"https://interlinea.aeterna-institute.org/api/v1/library/latin/commodianus/instructiones/1.23"},"next":{"citation":"Instructiones 1.25","label":"Poem 1.25","url":"https://interlinea.aeterna-institute.org/library/latin/commodianus/instructiones/1.25","api":"https://interlinea.aeterna-institute.org/api/v1/library/latin/commodianus/instructiones/1.25"},"credit":{"text":"Commodianus, Instructiones. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/COMM%7Cins1%7C001","quality":"proofread"}}