{"kind":"section","lang":"la","language":"Latin","title":"Instructiones 1.26","citation":"Commodianus, Instructiones 1.26","ref":"1.26","level":null,"urn":null,"url":"https://interlinea.aeterna-institute.org/library/latin/commodianus/instructiones/1.26","api":"https://interlinea.aeterna-institute.org/api/v1/library/latin/commodianus/instructiones/1.26","markdown":"https://interlinea.aeterna-institute.org/library/latin/commodianus/instructiones/1.26.md","author":{"name":"Commodianus","url":"https://interlinea.aeterna-institute.org/library/latin/commodianus"},"work":{"title":"Instructiones","url":"https://interlinea.aeterna-institute.org/library/latin/commodianus/instructiones","urn":"urn:cts:latinLit:stoa0096.stoa003"},"verse":true,"words":273,"text":"Respuis, infelix, bonum disciplinae caelestis\nEt ruis in mortem, dum uis sine freno uagari.\nPerdunt te luxuriae et breuia gaudia mundi,\nVnde sub inferno cruciaberis tempore toto.\nGaudia sunt uana, quibus oblectaris inepte.\nNon illa te reddunt hominem fuisse defunctum.\nAnni te non possunt iam triginta reddere doctum?\nNescius si primum errasti, respice canum.\nTu putas nunc uitam isti te perfrui laetum?\nIniurias, lites ibi sunt et damna diurnum,\nBella uel infanda, fraudes, cum sanguine furta,\nVlceribus corpus uexatur gemiturque, ploratur,\nSeu luis inuadit aut longo morbo teneris,\nAut natis orbaris, aut perdita coniugula defles;\nDestruitur totum, ruunt dignitatis ab alto;\nVreris pauperie dupliciter certe si languis:\nEt dicis uitam, ubi uitrea uita moraris?\nRespice iam tandem hoc tempus inritum esse;\nSed in futuro tibi spes est sine dolo uiuendi.\nViuere uoleba<n>t utique paruoli rapti,\nSed uita priuati iuuenes senescere forte,\nLautities diues perfrui quia ipse parabat;\nEt tamen inuiti reli<n>quimus omnia mundo.\nGens et ego fui peruersa mente moratus\nEt uitam istius saeculi coram esse putabam\nMortemque similiter sicut uos iudicabam adesse,\nCum semel exisset animus, perisse defunctum.\nHaec autem sic non sunt; sed conditor orbis et auctor\nRequisiuit enim fratrem a fratre peremptum:\nImpie, dic, inquit, ubinam frater? Ille negauit.\nSanguis enim fratris ad me perclamauit in altum.\nTorqueris, uideo, ubi nil sentire putabas,\nIlle autem uiuet et loca dextera tenet,\nDelicias fruitur, quas tu perdidisti, nefande!\nEt cum renouasti saeculum, et ille praegressus\nIam <in>mortalis erit; nam tu sub tartara planges.\nViuet certe Deus, qui defunctos uiuere fecit\nInnocuisque bonis ut reddat praemia digna,\nVesanis autem et impiis tartara saeua.\nIncipe sentire iudicia Dei, seducte!","prev":{"citation":"Instructiones 1.25","label":"Poem 1.25","url":"https://interlinea.aeterna-institute.org/library/latin/commodianus/instructiones/1.25","api":"https://interlinea.aeterna-institute.org/api/v1/library/latin/commodianus/instructiones/1.25"},"next":{"citation":"Instructiones 1.27","label":"Poem 1.27","url":"https://interlinea.aeterna-institute.org/library/latin/commodianus/instructiones/1.27","api":"https://interlinea.aeterna-institute.org/api/v1/library/latin/commodianus/instructiones/1.27"},"credit":{"text":"Commodianus, Instructiones. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/COMM%7Cins1%7C001","quality":"proofread"}}