{"kind":"section","lang":"la","language":"Latin","title":"Instructiones 1.42","citation":"Commodianus, Instructiones 1.42","ref":"1.42","level":null,"urn":null,"url":"https://interlinea.aeterna-institute.org/library/latin/commodianus/instructiones/1.42","api":"https://interlinea.aeterna-institute.org/api/v1/library/latin/commodianus/instructiones/1.42","markdown":"https://interlinea.aeterna-institute.org/library/latin/commodianus/instructiones/1.42.md","author":{"name":"Commodianus","url":"https://interlinea.aeterna-institute.org/library/latin/commodianus"},"work":{"title":"Instructiones","url":"https://interlinea.aeterna-institute.org/library/latin/commodianus/instructiones","urn":"urn:cts:latinLit:stoa0096.stoa003"},"verse":true,"words":318,"text":"Desidet <populus> absconsus ultimus sanctus\nEt quidem ignotus a nobis ubi moretur.\nPer nouem tribum agant et dimidiam ipsi,\nOmissae duae tribum haec sunt et dimidia nobis.\nPraecepitque Christus per legem uiuere priscos.\nViuamus nunc omnes, nouellae traditio legis\nLex ut ipsa docet! Apertius indico uobis.\nObrelictae duae tribum et dimidia: quare\nAb istis dimidia tribum? Vt martyres essent\nBellum cum infer<r>et electis suis in orbem,\nSeu certe sanctorum chorus prophetarum ad illam\nConsurgeret plebem, qui frenum inponeret illis,\nObsceni quos equi trucidarunt calci remissa\nNec suerit ad manus pacem aliquando tenere.\nSemotae sunt isti tribuum, ut mysteria Christi\nOmnia per istas conpleatur saeculo toto.\nSunt autem de scelere duorum fratrum enatae,\nAuspicio quorum facinus secutae fuere.\nNon merito tales dispersi sunt ipsi cruenti?\nConueniunt iterum propter mysteria castris.\nTunc autem properant conpleri legis narrata.\nOmnipotens Christus descendit ad suos electos,\nObscurati nobis qui fuerunt tempore tanto\nMilia tot facti; illa est gens uera caelestis.\nNon natus ante patrem moritur ibi, neque dolores\nIn suis corporibus sentiunt ut ulcera nata.\nPausantes in lecto suo mature recedunt\nOmnia conplentes legis, ideoque tutantur.\nTransire iubentur ad Dominum partibus istis\nExsiccat fluuium quibus sicut ante traiectis,\nNec minus et Dominus ipse producit cum illis.\nTransiit ad nostra, ueniunt cum rege caeleste.\nIn quorum itinere quod dicam, quo Deus educet,\nSubsidunt montes ante illos et fontes erumpunt:\nCaelestem populum gaudet creatura uidere.\nHic tamen festinant matre<m> defendere capta<m>.\nRex autem iniquus, qui obtinet, illum ut audit,\nIn partem boreae refugit et colligit omnes.\nSed cum se inlidet exercitu Dei tyrannus\nTerrore caelesti prosternuntur milites eius,\nIpse cum infando conprehenditur pseudopropheta;\nDecreto Domini traduntur uiui gehennae.\nEx eo primores et duces seruire iubentur.\nIntrabunt tunc sancti ad antiqua ubera matris,\nVt autem et illi refrigerent, quos malus ille suasit,\nIn uariis poenis cruciabat sibi credendos.\nVentum est ad finem, quod tollantur scandala mundo;\nIncipiet Dominus iudicium dare per ignem.","prev":{"citation":"Instructiones 1.41","label":"Poem 1.41","url":"https://interlinea.aeterna-institute.org/library/latin/commodianus/instructiones/1.41","api":"https://interlinea.aeterna-institute.org/api/v1/library/latin/commodianus/instructiones/1.41"},"next":{"citation":"Instructiones 1.43","label":"Poem 1.43","url":"https://interlinea.aeterna-institute.org/library/latin/commodianus/instructiones/1.43","api":"https://interlinea.aeterna-institute.org/api/v1/library/latin/commodianus/instructiones/1.43"},"credit":{"text":"Commodianus, Instructiones. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/COMM%7Cins1%7C001","quality":"proofread"}}