{"kind":"section","lang":"la","language":"Latin","title":"Instructiones 2.14","citation":"Commodianus, Instructiones 2.14","ref":"2.14","level":null,"urn":null,"url":"https://interlinea.aeterna-institute.org/library/latin/commodianus/instructiones/2.14","api":"https://interlinea.aeterna-institute.org/api/v1/library/latin/commodianus/instructiones/2.14","markdown":"https://interlinea.aeterna-institute.org/library/latin/commodianus/instructiones/2.14.md","author":{"name":"Commodianus","url":"https://interlinea.aeterna-institute.org/library/latin/commodianus"},"work":{"title":"Instructiones","url":"https://interlinea.aeterna-institute.org/library/latin/commodianus/instructiones","urn":"urn:cts:latinLit:stoa0096.stoa003"},"verse":true,"words":173,"text":"Matrona uis esse Christiana ut saeculi discens:\nAuro te circumdas aut sirica ueste, pudica,\nTerrorem legis ex auribus uento remittis,\nRes uanas adfectas cuncta de Zabuli pompa,\nOrnas et ad speclum cincinnos fronte reflexos,\nNec non et inducis malis medicamina falsa,\nIn oculis puris stibium peruerso decore,\nSeu crines tingis, ut sint toto tempore nigri.\nEst Deus inspector, penetrat qui singula corda.\nCeterum pudicis ista necessaria non sunt.\nClaro ac pudico sensu pertundite pectus;\nLex Dei testatur tales abscedere leges,\nEx corde quae credit femina marito probata\nSufficiat esse non cultibus sed bona mente.\nInduite uestes quas oportet, frigus ut ostent\nAut nimium solis, tantum ut pudico proberis\nEt in plebe Dei facultatis dona demonstres.\nDat tibi memoriam <Tabitha> clarissima quondam;\nExanimata iacet precibus uiduarum erecta.\nIn dando promeruit, non comtibus, inde leuari.\nVos matronae bonae uanitatis fugite decorem:\nIn<cestas in> feminas congruet cultura lupana.\nVincite malignum, pudicae feminae Christi,\nIn dando diuitias uestras ostendite totas.\nXancta Dei mulier diuitias corde demonstrat.\nYmnificato choro placitoque Christo seruire\nZelantes fauore Christo offerte odorem.","prev":{"citation":"Instructiones 2.13","label":"Poem 2.13","url":"https://interlinea.aeterna-institute.org/library/latin/commodianus/instructiones/2.13","api":"https://interlinea.aeterna-institute.org/api/v1/library/latin/commodianus/instructiones/2.13"},"next":{"citation":"Instructiones 2.15","label":"Poem 2.15","url":"https://interlinea.aeterna-institute.org/library/latin/commodianus/instructiones/2.15","api":"https://interlinea.aeterna-institute.org/api/v1/library/latin/commodianus/instructiones/2.15"},"credit":{"text":"Commodianus, Instructiones. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/COMM%7Cins1%7C001","quality":"proofread"}}