{"kind":"section","lang":"la","language":"Latin","title":"Iohannis 2.1-46","citation":"Corippus, Iohannis 2.1-46","ref":"2.1","level":null,"urn":null,"url":"https://interlinea.aeterna-institute.org/library/latin/corippus/iohannis/2.1","api":"https://interlinea.aeterna-institute.org/api/v1/library/latin/corippus/iohannis/2.1","markdown":"https://interlinea.aeterna-institute.org/library/latin/corippus/iohannis/2.1.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":282,"text":"Pellitur interea cunctis uastator ab oris\nMaurus et aduerso trepidus calcatur ab hoste.\nDeserit obsessas fugiens conterritus urbes\nTurbatusque metu montes concurrit ad altos\nDiraque muniuit posuitque mapalia siluis.\nImplentur uallesque cauae collesque supini\nGentibus innumeris camposque et flumina late\nCurua tegunt. latuit densis contermina tellus\nAgminibus montesque et celsis frondea siluis\nTecta latent pendente casa. fugit inde ferarum\nOmne genus, saeui reuerens uenabula Mauri,\nNec potuit miserum tantas euadere pestes,\nSed iacet affixis resupino in pectore telis.\nNon mitis uolucer ramis permissus in altis\nFrondibus aut mediis dulces suspendere nidos.\nArboribus religant congesto culmine cannas\nOmnibus, et nullo est uacuum iam in monte cacumen:\nQualiter infusae tellus contecta pruinae\nNube latet campique et montes arbor et omnis\nAlbet et ipse suis artatur motibus aer;\nEripitur crebris facies certissima rerum\nImbribus, et nullis noscuntur sidera signis.\nQuis mihi tot populos gentesque et proelia uates\nOrdinet arte noua? tu, Iustiniane, fauendo\nCuncta doce: admisce blanda dulcedine Musam.\nTemperet insuetis nutant quae carmina uerbis,\nTam fera barbaricae latrantia nomina linguae.\nPrimus init bellum, fraterna morte coactus,\nMaurorum princeps, Romanis subditus olim\nPrincipibus, gratus ducibus fidusque magistris,\nAntalas: duramque mouens in proelia dextram\nErexit furiale fremens, qua turbidus omnes\nImpulit aeratas bellorum ad praemia gentes.\nFinibus in Libycis suscepta pace fidelis\nIlle fuit plenosque decem perfecerat annos.\nHeu, ducis ignari quale indiscretio bellum\nMouit et extinctas fecit recalescere flammas!\nTunc furor incerti posuit plantaria Martis:\nPerfidiae crimen uel tantae semina +mortis\nIra dedit. gentes Libyae commouit amaras\nAcrior et totum turbauit caedibus orbem.\nNunc consanguineis sequitur densissima turmis\nFrexes et tumida laudat ceruice regentem,\nFortis gens et dura uiris bellique tumultu\nEffera, seu pedes it campis praesumpta per hostes,\nSiue frementis equi pulsat calcaribus armos.","prev":{"citation":"Iohannis 1.578-581","label":"Book 1, lines 1.578-1.581","url":"https://interlinea.aeterna-institute.org/library/latin/corippus/iohannis/1.578","api":"https://interlinea.aeterna-institute.org/api/v1/library/latin/corippus/iohannis/1.578"},"next":{"citation":"Iohannis 2.47-99","label":"Book 2, lines 2.47-2.99","url":"https://interlinea.aeterna-institute.org/library/latin/corippus/iohannis/2.47","api":"https://interlinea.aeterna-institute.org/api/v1/library/latin/corippus/iohannis/2.47"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}