{"kind":"section","lang":"la","language":"Latin","title":"Iohannis 2.100-143","citation":"Corippus, Iohannis 2.100-143","ref":"2.100","level":null,"urn":null,"url":"https://interlinea.aeterna-institute.org/library/latin/corippus/iohannis/2.100","api":"https://interlinea.aeterna-institute.org/api/v1/library/latin/corippus/iohannis/2.100","markdown":"https://interlinea.aeterna-institute.org/library/latin/corippus/iohannis/2.100.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":285,"text":"Est aries illis infandi machina belli,\nComptaque dispositis ponunt tentoria signis,\nHorrida gens et dura uiris audaxque triumphis\nInnumeris, nullo bellis quae tempore cessat,\nImpia, crudelis: nullas timet ille ruinas,\nSed licuit timuisse +tantum se iure litebit:\nPaeniteat saeuisse diu. nam fortis Ilaguas\nQuondam per latos prostratus uulnere campos\n+iuncta seua dedit, praedis bellisque pepercit.\nIerna ferox his ductor erat Gurzilque sacerdos.\nHuic referunt gentes pater est quod corniger Ammon,\nBucula torua parens: tanta est insania caecis\nMentibus! ah, miseras fallunt sic numina gentes!\nIfurac infestis uenit consultus in armis:\nHic pedes insignis clipeo telisque resultat\nEt mucrone potens, saeuum dum tendit in hostem.\nMuctuniana manus calidis descendit ab oris,\nQuae Tripolis deserta colit; Gadabisque maligna\nMittit ab arce uiros, et saeuis moenibus horrens\nDigdiga uicinis acies dedit improba ripis.\nTunc, Velanideis(==VE+LA+NI-DE-IS) uerrunt qui stagna phaselis,\nConueniunt populi, qui currunt arte per aequor,\nInflexos tremulis iactantes piscibus hamos.\nBarcaei solito +curam+ saeuire furore\nDeseruere suas et nostras quaerere terras\nIncipiunt. his arma furor bellumque ministrat\nEt genus acre uiris, clipeos gladiosque minaces,\nNon solito uinctos lateri, sed circulus ambit\nPraestringens modico complexus bracchia gyro,\nVaginasque aptant nudis pendere lacertis.\nNec tunicae manicis ornant sua bracchia Mauri,\nInsita non ullis stringuntur cingula bullis,\nDiscinctique feras agitant in proelia turmas,\nBinaque praeualido portant hastilia ferro.\nHorrida substrictis dependens stragula membris\nEx umeris demissa iacet; tunc lintea taetrum\nPalla caput stringit, nodo suffulta tenaci,\nCrudaque sub nigra calcatur Maurica planta.\nMarmaridas gentes tot pertulit Africa bellis.\nQuis miseram superesse putet? non sufficit istud,\nO superi! iam audax alternis surgit ab oris\nAduersa de parte fremens dux ille ruinas,\nQuas illi Romana manus per uulnera Martis\nAnte dedit: tantam inde ferus nunc colligit iram.","prev":{"citation":"Iohannis 2.47-99","label":"Book 2, lines 2.47-2.99","url":"https://interlinea.aeterna-institute.org/library/latin/corippus/iohannis/2.47","api":"https://interlinea.aeterna-institute.org/api/v1/library/latin/corippus/iohannis/2.47"},"next":{"citation":"Iohannis 2.144-187","label":"Book 2, lines 2.144-2.187","url":"https://interlinea.aeterna-institute.org/library/latin/corippus/iohannis/2.144","api":"https://interlinea.aeterna-institute.org/api/v1/library/latin/corippus/iohannis/2.144"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}