{"kind":"section","lang":"la","language":"Latin","title":"Iohannis 2.233-281","citation":"Corippus, Iohannis 2.233-281","ref":"2.233","level":null,"urn":null,"url":"https://interlinea.aeterna-institute.org/library/latin/corippus/iohannis/2.233","api":"https://interlinea.aeterna-institute.org/api/v1/library/latin/corippus/iohannis/2.233","markdown":"https://interlinea.aeterna-institute.org/library/latin/corippus/iohannis/2.233.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":292,"text":"Tunc Romana acies paulatim excedere pugna\nNititur aduersosque reluctat prendere colles.\nInterea uelox placidas concusserat aures\nNuntius, ingenti conturbans castra tumultu,\nDescendisse feros siluis et montibus hostes\nInnumeros, campos acies implesse nefandas,\nObsessosque locos populis armisque coruscis,\nIam potuisse duces tantae succumbere pugnae.\nIlicet omnis eques campo decurrit aperto:\nNam cunctos ciuilis amor pulsabat et ardor\nDuctorisque metus. compellit terga suorum\nVoce uerendus agens: interdum pulsat et hasta\nQuos cessare uidet. populos excedere castris\nImperat auxilioque suis succurrere dictat.\nVtque leues alas campis produxit apertis\nPraecessitque duces, illos per castra morantes\nIncrepat et rauci sonitu conterritat aeris.\nBucina saepe ciens tremulo gemit horrida cantu.\nSubsequitur crebris acies collecta maniplis.\nVngula sidereos contristat puluere campos,\nEt solis pallescit honor radiosque micantes\nColligit, oppositaque polus turbatur harena.\nPraecipites ueluti surgunt de montibus Euri\nAeoliis feruentque graues, uerruntque procellae\nLitus harenosum, tunc tristibus aera turbant\nFlatibus, aduersis scindentes nubila flabris:\nSic campos acies densis Romana cateruis\nTurbat, et absentes puluis iam comprimit hostes.\nCautus ab aduersa uenientes rupe Melangus\nVidit, et ingenti turbans clamore cohortes\nBarbara signa dedit. paulatim linquere campos\nIncipiunt et tuta acies per castra recondunt.\nAt ueniens fortis, uallatus et agmine, ductor\nMontibus in summis astantes conspicit hostes,\nIncolumesque suos gaudens suscepit ouantes.\nHinc, fera quae saeuis et tristia bella periclis\nGesserat illa manus, referunt faucesque malignas.\nPraecipit ipse uiris fossas et castra locare\nHaud procul aduerso, nimium sed proximus, hoste.\nPerficiunt praecepta citi planumque per aequor\nCandida mox niueis figunt tentoria uelis.\nHic Romana manus positis fortissima castris\nPer uarium discurrit opus. pars arma reponit\nAlta locis, pensat pharetras arcusque retendit,\nArduaque excelsis sustentant uela columnis.\nOrdine configunt pratis in mollibus hastas\nAtque hastis solite per campos scuta reclinant,\nLoricasque graues et conos pellibus aptant\nSuppositis, glandes et cetera tela reponunt.","prev":{"citation":"Iohannis 2.188-232","label":"Book 2, lines 2.188-2.232","url":"https://interlinea.aeterna-institute.org/library/latin/corippus/iohannis/2.188","api":"https://interlinea.aeterna-institute.org/api/v1/library/latin/corippus/iohannis/2.188"},"next":{"citation":"Iohannis 2.282-324","label":"Book 2, lines 2.282-2.324","url":"https://interlinea.aeterna-institute.org/library/latin/corippus/iohannis/2.282","api":"https://interlinea.aeterna-institute.org/api/v1/library/latin/corippus/iohannis/2.282"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}