{"kind":"section","lang":"la","language":"Latin","title":"Iohannis 2.282-324","citation":"Corippus, Iohannis 2.282-324","ref":"2.282","level":null,"urn":null,"url":"https://interlinea.aeterna-institute.org/library/latin/corippus/iohannis/2.282","api":"https://interlinea.aeterna-institute.org/api/v1/library/latin/corippus/iohannis/2.282","markdown":"https://interlinea.aeterna-institute.org/library/latin/corippus/iohannis/2.282.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":282,"text":"Alipedes meritos pars altera colligit ardens,\nPabula certa ferens. epulis uolat ille parandis\nDoctus, aena locans flammis alimenta ministrat.\nHic gelidos fontes puteo rapit, atque per herbas\nIncuruos parat ille toros, et fercula ponit\nCuncta locis aptans dapibus mundansque fluentis.\nMaximus interea curas sub pectore ductor\nVoluebat diuersa mouens, gentesque locosque\nCaptiuosque simul bellum quos gentibus Afros\nMiscuit et miseros praeda raptante subegit.\nAestuat et curis iterumque iterumque uolutat,\nQuid faciat dubius. iam nunc committere pugnas\nVirtus summa parat. pietas modo parcere dictat,\n+ quippe ne(==NE-) captiuos ullo discrimine quasset,\nPro quibus arma mouet. sensus uigilanter oberrat\nInter utrumque uolans: animus decernit et obstat.\nPectore pugna furit: pietas occurrit et ira.\nAc uelut agricola immixtis cum sentibus arua\nFerre uidens fruges, maerenti pectore curat\nImpiger infaustos agris conuellere sentes,\nSed (mouet ipsa Ceres) pauitat damnumque repensat,\nNe male dimissi perdant aut hordea uepres,\nAut bene non pereant tristes cum frugibus herbae:\nSic pater alternas pensabat pectore curas\nOmnia lance probans, animus quo pondere uergat\nQuidue gerat. nec stare libet nec dulce sedenti\nColloquium: tacita geminat suspiria lingua.\nDum curis agitur, pendens dum pectus anhelat,\nSurgit et in mediis mauult confligere castris,\nItque reditque uias, animum corpusque fatigans.\nHunc paribus curis flagrans comitatur euntem,\nMagnanimus ductoris honor nimiumque benignus\nConsiliique decus, lateri Ricinarius haerens.\nHunc habet in saeuis fidum sociumque periclis,\nEt uirtute uirum et discreta mente leuamen.\nIllum etiam summis uicto Mauorte triumphis\nTot nimios gaudet secum tolerasse labores\nMartis et ad summam pariter uenisse coronam.\nEt tunc ergo comes curis non impar anhelis\nIbat et alterno placidus sermone leuabat.\n\"Nutat in angustis omni de parte periclis\nSensus\", ductor ait, \"curis et pectus anhelat,\nDum mouet, in dubiis quae sit fortuna salutis.","prev":{"citation":"Iohannis 2.233-281","label":"Book 2, lines 2.233-2.281","url":"https://interlinea.aeterna-institute.org/library/latin/corippus/iohannis/2.233","api":"https://interlinea.aeterna-institute.org/api/v1/library/latin/corippus/iohannis/2.233"},"next":{"citation":"Iohannis 2.325-368","label":"Book 2, lines 2.325-2.368","url":"https://interlinea.aeterna-institute.org/library/latin/corippus/iohannis/2.325","api":"https://interlinea.aeterna-institute.org/api/v1/library/latin/corippus/iohannis/2.325"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}